рак кесилигә гириптар болған пәләстинлик балилар түркийәдә давалиниду

түркийә авази радийоси хәвири: сәһийә министири фаһрәттин коҗа түркийә бүйүк милләт мәҗлиси (парламенти) дә қилған сөзидә, пәләстиндә давалаш ишлири йерим қалған пәләстинлик рак бимарлириниң түркийәгә елип келинидиғанлиқини ейтти.

министир коҗа бу һәқтә исраилийә сәһийә министири билән телефонда көрүшкәнликини, униңға һәрқандақ шәкилдики зораванлиқни қобул қилғили болмайдиғанлиқини ениқ оттуриға қойғанлиқини әскәртти.

у, сәһийә хизмитиниң изчиллиқиға капаләтлик қилалмаслиқниң һечқандақ изаһати йоқлуқи тоғрисида исраилийә сәһийә министири билән ортақ тонуш һасил қилғанлиқлирини тәкитләп мундақ деди:

«телефон сөһбитимиздә, исраилийә сәһийә министириға,  түркийә-пәләстин достлуқ дохтурханисиниң ғәззәдә рак кесәлликлирини давалап келиватқан бирдинбир дохтурхана икәнликини, шараит йар бәрмигәнлики үчүн, буниңдин кейин мулазимәт қилалмайдиғанлиқини байан қилдим.»

коҗа исраилийә сәһийә министириға, исраилийәниңму бигунаһ балиларға давамлиқ давалиниш шараити йаритип бериш мәсулийити барлиқини хатириләткәнликини әскәртип мундақ деди:

«исраилийә сәһийә министириға,  балиларни өз ичигә алған бимарларни қутқузуш аптомобиллири билән мисирға, у йәрдин қутқузуш айропиланлири билән түркийәгә кәлтүрүп давалашқа тәййар икәнликимизни байан қилдим. рак кесилигә гириптар болған пәләстинлик балиларни өз ичигә алған рак бимарлирини әң қисқа вақит ичидә түркийәгә елип келишкә башлаймиз.»

у йәнә бүгүн йолға чиқидиған парахот арқилиқ дора, давалаш үскүнилири, 8 дала дохтурханиси, 20 қутқузуш аптомобили вә давалаш материйаллири қатарлиқ 500 тонна теббий йардәм әслиһәлирини районға йәткүзүп беридиғанлиқлириниму сөзлиригә илавә қилди.