dölet xewpsizlik kéngishi bayannamesi élan qilindi

türkiye awazi radiyosi xewiri:  tünügün (2023-yili 9-awghust) türkiye  jumhur reisi rejep tayyip erdoghanning riyasetchilikide ötküzülgen dölet xewpsizlik kéngishi yighinidin kéyin bayanname élan qilindi.

türkiye jumhuriyiti jumhur reislik mehkimisi uchur – alaqe ishliri idarisining ammiwi ortaqlishish tor bétidiki sehipiside élan qilinghan bayannamege qarighanda, dölet xewpsizlik kéngishi yighinida, bölgünchi térrorluq teshkilati p k k/k j k – p y d/y p g, fethullahchi térorluq teshkilati we daésh qatarliq térrorluq teshkilatlirini öz ichige alghan türkiyening milliy ittipaqliqi we barawerlikige qarita türlük tehditlerni shekillendürüwatqan xirislargha qarshi dölet ichi - sirtida keskin dawamlishiwatqan herbiy heriketler heqqide dölet xewpsizlik kéngishige doklat sunulghan.

bayannamede iraq bilen her sahediki hemkarliqning yenimu tereqqiy qilishining döletler we rayonning muhim netijilerni qolgha keltürüshige töhpe qoshidighanliqi qeyt qilinghan, shundaqla türkiyening térrorizmgha qarshi kürishi, bixeterlik we muqimliqni qoghdash paaliyetlirini chin dilidin qollashning ikki dölet otturisidiki hemkarliqning asasini kücheytidighanliqi eskertilgen.

bayannamede bildürülüshiche, yighinda, rusiye – ukraina urushining tereqqiyati we bu urushning kéyinki basquchlarda rayongha körsitidighan tesiri tepsiliy muzakire qilinghan, qaradéngizdiki jiddiychilikning küchiyip kétishining héchkimning menpeetige paydiliq emesliki tekitlengen.

buningdin bashqa yene, herqaysi terepler söhbet ötküzüsh arqiliq urushqa xatime bérishke chaqiriq qilinghan. shundaqla ashliq kélishimige qaytishning ashliqqa mohtaj döletlerde yüz bérish éhtimali bolghan qiyinchiliqlarning aldini alidighanliqi we ashliq muqimliqigha töhpe qoshidighanliqi tekitlengen.

yighinda yene, afriqa qiteside meydangha kelgen we afriqa chong quruqluqigha yamrap kétish éhtimalliqi yuqiri bolghan eng yéngi özgirishler heqqide muzakire élip bérilghan, hemde afriqa chong quruqluqi mesililirini eng muwapiq hel qilish charisini peqet afriqa chong quruqluqning igilirila tapalaydighanliqi qeyt qilinghan.

bayannamede islam dinini nishan qilip, 2 milyardqa yéqin musulmanni renjitiwatqan  we birleshken döletler teshkilati teripidinmu öchmenlik jinayiti dep qaralghan qebih qilmishlarning aldini élish؛ jawabkarlarni jazalandurush mesuliyitini ada qilmighan döletler pikir erkinliki namida öchmenlik uruqini chéchish xahishini özgertishke, muqeddes qimmet qarashlirigha qaritilghan hujumlargha qarshi birlikte küresh qilishqa chaqiriq qilinghan.

bayannamede yene, yer shari xaraktérlik kirizisqa aylinishqa bashlighan kilimat özgirishining tertipsiz köchmenler kirizisidin ijtimaiy böhranlarghiche, ichki qalaymiqanchiliqlardin döletler ara toqunushlarghiche bolghan nurghun mesililerni keltürüp chiqiridighan tesirlirini peqet xelqara jemiyetning adil, semimiy tirishchanliqi we hemkarliqi arqiliqla hel qilghili bolidighanliqi tekitlengen.