chawushoghlu: süriyeliklerni beshshar esed hakimiyitining kontrolluqidiki rayonlarghimu qayturimiz

türkiye awazi radiyosi xewiri: chawushoghlu bir téléwiziye qanilining neq meydan pirogrammisida, küntertipke munasiwetlik mesililer heqqide toxtalghanda, türkiyege yéngi köchmenlerning kélishige taqabil turush üchün zörür tedbirlerni qolliniwatqanliqlirini tekitlep mundaq dédi: «idlibta yüz ming öy sélip, süriyeliklerni orunlashturush arqiliq u yerdin türkiyege köchmenlerning kélishining aldini alduq. yene bir tereptin, süriye we iran chégrasigha sépil soqush we eqliy iqtidarliq kaméralarni ornitish arqiliq qoshumche köchmenlerning kirishining aldini alduq. buningdin bashqa yene, chégrimalirimizning sirtidiki herbiy mewjudiyitimizmu köchmenlerning dölitimizge kirish bésimini azaytti.»

tashqi ishlar ministiri mewlut chawushoghlu  süriyening  shimalidiki térrorchilardin tazilanghan rayonlargha 553 ming süriyelikning türkiye teripidin qayturulghanliqini, bu basquchni  pilan dairiside izchil dawamlashturidighanliqlirini bayan qildi.

chawushoghlu rusiyening paytexti moskwada ötküzülgen türkiye, rusiye, iran we demeshiq hökümiti töt terep tashqi ishlar ministirliri yighinining asasliq küntertip maddiliridin birining süriyelik köchmenlerni öz  yurtigha qayturush mesilisi teshkil qilghanliqini qeyt qildi, hemde birleshken döletler teshkilati we xelqara jemiyetningmu qollishi astida türkiyediki süriyeliklerni beshshar esed hakimiyitining kontrolluqidiki jaylarghimu ewetishte muhim rol oynaydighan yol xeritisi sizip chiqidighanliqlirini eskertip mundaq dédi: «süriyeliklerni peqet bixeter jaylarghila emes, beshshar esed hakimiyitining kontrolluqidiki jaylarghimu qayturush iradimiz qetiydur. bu heqte beshshar esed hakimiyiti bilenmu söhbet ötküzüshke bashliduq.»