chawushoghlu sudan téz yardem bérish küchlirining qomandani bilen téléfonlashti

türkiye awazi radiyosi xewiri: türkiye tashqi ishlar ministirliqining bildürüshiche, tashqi ishlar ministiri mewlut chawushoghlu sudan téz yardem bérish küchlirining qomandani muhemmed hemdan dagalu bilen bilen téléfonda körüshken.

téléfon söhbitide, sudandiki türkiye puqralirini tarqaqlashturush jeryanigha munasiwetlik mesililer muzakire qilinghan.

türkiye dölet mudapie ministirliqi teripidin élan qilinghan bayanatta bolsa, türkiye puqralirini tarqaqlashturushqa ketken we bu jeryanda oq tegken ayropilannimu öz ichige alghan  «C-130» tipliq ikki ayropilanning sudandin bixeter halda ayrilghanliqi bildürülgen.

bayanatta tekitlinishiche, dölet mudapie ministirliqigha tewe «A400M» tipliq yene bir tarqaqlashturush ayropilani sudan portidin yolgha chiqip, 101 ademni élip, tünügün saet 19.00 da istanbul ayrodurumigha qonghan.

sudanning paytexti xartum we bashqa sheherlerde 15 – aprél küni tang seherde sudan armiyesi bilen téz yardem bérish küchliri otturisida qoralliq toqunushlar bashlanghanidi.

sudan armiyesi bilen téz yardem bérish küchliri otturisidiki «téz yardem bérish küchlirining armiyege toluq daxil bolushi» nishan qilinghan herbiy bixeterlik islahati pilani mesilisidiki ixtilap yéqinqi bir nechche ay ichide qattiq toqunushlargha aylinip ketkenidi.

sudan sehiye ministirliqi sudan armiyesi bilen téz yardem bérish küchliri otturisida 15-aprél küni bashlanghan toqunushlarda 512 kishining qaza qilghanliqini, 4193 kishining yarilanghanliqini uqturghanidi.

toqunushlar sewebidin, türkiye, amérika qoshma ishtatliri, xitay, rusiye, engiliye, firansiye we seudi erebistanni öz ichige alghan 50 nechche dölet puqralirini quruqluqtin éfiyopiye we misir arqiliq, déngizdin sudan porti arqiliq, hemde hawa yolliri arqiliq dawamliq tarqaqlashturmaqta.