aqar: türkiye puqralirini tarqaqlashturush üchün jemiy 5 tiransiport ayropilani ewettuq

türkiye awazi radiyosi xewiri: dölet mudapie ministiri xulusi aqar toqunush yüz bériwatqan sudandin türkiye puqralirini tarqaqlashturush üchün, «koja yüsüf» dep atalghan «A400M» tipliq ikki ayropilan bilen qoshulup, jemiy 5 tiransiport ayropilani ewetkenliklirini éytti.

ministir aqar qeyseride bergen bayanatida, sudandiki armiye terep bilen téz yardem bérish küchliri otturisida dawamlishiwatqan toqunushlar we türkiye puqralirini tarqaqlashturush mesililirige dair soalgha jawab bergende, sudanda herqaysi guruppilar otturisida toqunushlar yüz bériwatqanliqini eskertti.

aqar bu toqunushlarning xeterlik ehwallarni keltürüp chiqiriwatqanliqini tekitlep mundaq dédi: «bu xeterlik ehwallar tüpeyli, tashqi ishlar ministirliqimiz bilen birlikte sudanda yashawatqan puqralirimizni tarqaqlashturush pilanini tüzduq we bu pilanni yolgha qoyushqa bashliduq. bir qisim puqralirimiz éfiyopiye arqiliq tarqaqlashturuldi.»

tarqaqlashturushqa éhtiyajliq jaylar üchün paaliyetlerning üzlüksiz dawamlishiwatqanliqini bayan qilghan aqar mundaq dep körsetti: «puqralirimizni türkiyege élip kélish üchün 5 ayropilan ajrattuq. < C-130> tipliq üch ayropilanimiz arqiliq xartumning shimalidiki wadi seyidnadin 210 puqramizni tarqaqlashturush üchün xizmet ishlewatimiz. yene bir tereptin, «A400M» tipliq ikki ayropilanimiz sudan portigha qondi. u yerde 250 puqramizning barliqidin xewer taptuq. bu ayropilanlardin biri qisqa waqit ichide sudan portidin puqralirimizni türkiyege keltüridu.»

ayropilanlarning heriketlirini yéqindin közitiwatqanliqlirini qeyt qilghan aqar, «puqralirimizni türkiyege keltürüsh xizmiti ete kechkiche tamamlinidu». dédi.

yene bir tereptin, ministir aqarning bayanatidin kéyin, tünügün kechte sudan portidin yolgha chiqqan türkiye armiyesige tewe <A400M> tipliq tarqaqlashturush ayropilani enqere waqti kéche 02:30 de istanbul ayrodurumigha qondi.

tarqaqlashturulghan 170 türkiye puqrasi türkiyege qaytip kelgenlikidin intayin xursen  ikenliklirini izhar qilishti.

türkiye jumhuriyiti dölet mudapie ministirliqimu toqunushlar dawamlishiwatqan sudanda qapsilip qalghan türkiye puqralirini tarqaqlashturush xizmitining dawamlishiwatqanliqini, tunji türkümdiki türkiye puqralirining türkiye armiyesige tewe ayropilanlar bilen bixeter halda türkiyege keltürülgenlikini uqturdi.

dölet mudapie ministirliqining  ammiwi ortaqlishish tor béti Twitter sehipiside, bu heqte élan qilinghan bayanatida, mundaq déyildi: «barliq puqralirimiz türkiyege keltürülgenge qeder tarqaqlashturush xizmitimiz üzlüksiz dawamlishidu.»