shentop qazaqistan parlamént bashliqi bilen körüshti

türkiye awazi radiyosi xewiri: türkiye büyük millet mejlisi reisi mustafa shentop mejlis yighin zalida,  türkiy tillirida sözlishidighan döletler parlamént ezaliri mejlisining 12 – nöwetlik omumiy kéngesh yighini munasiwiti bilen türkiyege kelgen qazaqistan parlamént bashliqi yérlan koshanow  we uning hemrahliqidiki heyet bilen körüshti.

uchrishishtin kéyin, shentop bilen koshanow türkiye - qazaqistan parlaméntlar ara hemkarliq kélishimini imzalidi.

uchrishishta, shentop 19-mart küni qazaqistanda ötküzülgen parlamént saylimidiki ghalibiyiti munasiwiti bilen koshanowni tebriklidi, hemde yéngi dewrning qazaqistan parlaménti üchün xeyrlik bolushini tilidi.

shentop qazaqistanning  6 – féwral küni qahramanmarashni merkez qilghan türkiyening 11 wilayitide yüz bergen yer tewresh apitidin kéyin türkiyege qilghan yardimi üchün qazaqistangha minnetdarliq bildürüp mundaq dédi: «bundaq azab-oqubetlik peytlerde qérindashlirimizning bizge yardem qilishi bizning eng chong tesellimiz boldi.»

u ikki tereplik munasiwetler we rayon mesililiri muzakire qilinghan uchrishishta mundaq dédi: «qazaqistanning weziyitining muqimliqi türk dunyasi üchün nahayiti zor ehmiyetke ige. türk döletliri teshkilatining paaliyetlirini  tüzümleshtürüshte qazaqistan bashlamchiliq rol oynimaqta.»

shentop türkiye – qazaqistan parlaméntlar ara hemkarliq kélishimining ikki dölet parlaméntliri otturisidiki dostluq we qérindashliq munasiwetlirini kücheytish arzusi we ortaq iradining namayendisi ikenlikini qeyt qildi.

qazaqistan parlamént bashliqi yérlan koshanow  bolsa parlamént bashliqliqigha saylanghandin kéyin tunji qétim türkiyede ziyarette bolghanliqini, bu ziyaretning simwolluq ehmiyetke ige ikenlikini bayan qildi.

koshanow  qahramanmarashni merkez qilghan türkiyening 11 wilayitide yüz bergen yer tewresh apiti sewebidin köngüllirining intayin yérim ikenlikini, türkiyening diplomatiye siyasitini yéqindin közitiwatqanliqlirini éytti.

u türkiyening rusiye – ukraina urushi mesiliside oynawatqan muressechilik rolining intayin muhimliqini tekitlidi.

bu ariliqta, shentop paytext enqerediki türkiye-qazaqistan dostluq baghchisining échilish murasimida qilghan sözide mundaq dédi: «xuddi bügünkige oxshashla buningdin kéyinmu hem türkiye – qazaqistan otturisidiki munasiwetlerde hemde türkiye - musteqil türk döletliri otturisidiki köp tereplik munasiwetlerde qérindashliq, hemkarliq we ittipaqliq iradimizni dawamliq namayan qilimiz.»

shentop her ikki döletning rehbirining türkiye bilen qazaqistanni ortaq meqset we yönilishte tereqqiy qildurush iradisini namayan qiliwatqanliqini eskertip mundaq dédi: «énérgiye we dölet mudapiesi qatarliq sahelerdiki hemkarliqimiz her ikki döletning toluq musteqilliq meydanini kücheytmekte.»