qalin: amérika bilen türkiye téximu keng diyalogqa éhtiyajliq

türkiye awazi radiyosi xewiri: jumhur reislik mehkimisining bayanatchisi ibrahim kalin énérgiyedin köchkiche, térroizmgha qarshi küreshtin ukrainadiki urushqiche bolghan dunya duch kelgen qiyinchiliqlarning bir-birige gireliship ketkenlikini, bu sewebtin amérika-türkiye otturisida téximu keng géopolitikiliq istratégiyelik diyalogqa éhtiyajliq ikenliklirini éytti.

jumhur reislik mehkimisining bayanatchisi ibrahim kalin amérikaning niyu york shehiride, amérika soda birleshmiside ötküzülgen amérika-türkiye soda-sanaetchiler munbirige qatnashti.

u 6-féwral (2023) tewresh merkizi qahramanmarash bolghan yer tewresh apetlirining türkiye tarixidiki we zamaniwi tarixidiki eng chong yer tewresh apetliridin biri ikenlikini tekitlidi.

u jumhur reis rejep tayyip erdoghanning apetke uchrighanlar üchün bir yil ichide 200 ming yürüsh öy sélish toghrisida wede bergenlikini qeyt qildi.

u yene bir jehettin éytqanda, tarixtiki eng éghir tebiiy apet yüz bérip aridin üch ay ötkendin kéyin, omumiy saylamning kéchiktürülmestin del waqtida ötküzülüshining nahayiti yaxshi ehwal ikenlikini eskertip: «méningche bundaq chong apetke uchrighan bashqa döletni saylam ötküzüshke jüret qilalaydu, dep oylimaymen» dédi.

u shiwétsiye bilen finlandiyening shimaliy atlantik ehdi teshkilati-natogha eza bolush mesiliside türkiyening pozitsiyesi toghrisida toxtilip,  ikki döletning türkiyening bixeterlik endishelirini hel qilish üchün qedem tashlishi kéreklikini tekitlidi.

u amérikaning türkiyeni «F-16» küreshchi ayropilani bilen teminlesh we zamaniwilashturush musapisini buninggha baghlishining «pütünley eqilge sighmaydighan, qobul qilghili bolmaydighan we ünümsiz ish» ikenlikini bildürdi.

u türkiyening rayondiki énérgiye turuba yolidin tartip yéngi tereqqiyatlarda asasliq rol oynaydighanliqini tilgha élip, kem bolsa bolmaydighan dölet bolush süpiti bilen rayondiki barliq türlerde nezerge élinishi kéreklikini otturigha qoydi.

u amérika kongre ezalirining ikki döletning géopolitikiliq dunyawi menpeetliri we natodiki munasiwetlerning istratégiyelik ehmiyiti asasida türkiyeni köp ziyaret qilishini kütidighanliqlirini bildürüp, amérika soda dunyasinimu ikki dölet otturisidiki soda hejimini ashurushqa chaqirdi.

u: «türkiyede soda dunyasi üchün dostane muhit bar, meblegh salghanlar choqum melum paydigha érishidu» dédi.