türkiyening washingtondiki elchixanisi yardem pidaiylirigha minnetdarliq bildürüsh murasimi ötküzdi

türkiye awazi radiyosi xewiri: türkiyening washingtonda turushluq bash elchisi hasan murat merjan 6-féwral qahramanmarashta yüz bergen 7.7 we 7.6 bal yer tewreshlerning tesirige uchrighanlargha yardem toplash paaliyitige qatnashqan pidaiylargha minnetdarliq guwahnamisi tarqitip berdi.

bash elchi merjan türkiyening washingtondiki elchixana binasida ötküzülgen murasimda, uda bir qanche kün boyiche yardem buyumlirini retlep, sanduqlargha qachilash xizmetlirini qilghan pidaiylarni bir-birlep sehnige teklip qilip, guwahnamilirini teqdim qildi.

bash elchi merjan pidaiylargha xitaben söz qilip: «biz silerge qanchilik rehmet éytsaqmu azliq qilidu. siler bolmighan bolsanglar, bu ishni qilish mumkin bolmaytti, silerning töhpenglar bibahadur» dédi.

merjan texminen 250 pidaiy qatnashqan murasimda toplanghan yardemning miqdarining zorliqigha isharet qilip: «shunchilik köp matériyalni silerning qimmetlik töhpengler sayisida tézlikte retlep eweteliduq. puqralirimizla emes, amérikaliq dostlirimizmu bizge yardemchi  boldi» dégenlerni qeyt qildi.

elchixanining bu heqtiki bayanatida: «elchixanimizgha amérika qoshma ishtatlirining oxshash bolmighan jayliridin 2023 – yili 2 – martqiche chédir, ediyal, uxlash xaltisi, dora we yémeklik qatarliqlar bolup, jemiy 234 tonna yardem matériyali iane qilindi. amérika miqyasidiki omumiy yardem matériyalliri miqdarining 2500 tonnidin éship kétishi texmin qilinmaqta» dégen ibarilerge orun bérildi.