xelqara jemiyet türkiyediki apet rayonlirigha qoshumche yardemlerni yollashni dawamlashturmaqta

türkiye awazi radiyosi xewiri: rusiye pirézidénti wladimir putin türkiyediki yer tewreshtin kéyin izdesh we qutquzush xizmitige qatnishiwatqan rus qutquzush xadimlirining sanini köpeytish toghrisida yolyoruq chüshürdi؛ rusiyening tünügün (8-féwral) türkiyege ewetken 50 qutquzush xadimi we 11 doxturni qoshqanda, apet rayonidiki rus mutexessislirining sani 150 din éship ketti.

giruziyemu yene 40 kishilik izdesh-qutquzush etritini türkiyege ewetti. mezkur etretning adiyaman apet rayonida izdesh – qutquzush xizmetliri bilen shughulliniwatqan 60 kishilik tunji türküm giruziye qutquzush etriti bilen birlikte xizmetlirini dawamlashturidighanliqi bildürüldi.

türkiyege izdesh-qutquzush etriti ewetken ezerbeyjan, ezerbeyjan miqyasidiki dölet doxturxaniliridin yer tewreshte yarilanghanlar üchün 2000 kariwat ajratqanliqini élan qildi.

hawadin yardem bérish karidori tesis qilip, türkiyege jiddiy qutquzush buyumliri bésilghan tunji ayropilanini ewetken iraq hökümiti, her küni türkiye we süriyege ikki yardem ayropilanining ewetilidighanliqini uqturdi.

buningdin ilgiri yer tewresh apetliride nurghun utuqlarni qolgha keltürgen kespiy xadimlirini türkiyege ewetken gérmaniyemu, chédir, uxlash xaltisi, ediyal, lagér kariwiti, issitquch we générator qatarliqlardin terkib tapqan 80 tonna yardem eshyasining rayongha yötkilidighanliqini uqturdi.

ottura amérika döliti salwador türkiyege 100 din artuq izdesh-qutquzush xadimi we qutquzush itlirini yollidi.

shimaliy qibris türk jumhuriyitidin 100 dane éghir tipliq qurulush we yük mashinisi apet rayonigha qarap yolgha chiqti.

türkiyege ikki ayrim izdesh - qutquzush etriti ewetken girétsiye, besh ayropilan bilen insanperwerlik yardimi ewetishni qarar qildi.

yaponiye bash weziri kishida fumiyo türkiyege qutquzush etretlirini ewetkenliklirini bildürüp, yerlik xelqning éhtiyajigha asasen, kéreklik yardemlerni köpeytidighanliqlirini eskertti.

jenubiy afriqa ammiwi teshkilatlirining pidaiy sehiye etretliri, qahramanmarash merkezlik yer tewreshlerning zerbisige uchrighanlargha yardem bérish üchün türkiyege qarap yolgha chiqti.

liwiyemu yer tewreshning zerbisige uchrighan rayonlargha hemnepes bolush üchün, türkiyege insanperwerlik yardem matériyallirining ewetilgenlikini uqturdi.

buningdin ilgiri 100 kishilik qutquzush etriti bilen insanperwerlik yardimi ewetken özbékistan, dala doxturxanisi qurush üchün 71 kishilik sehiye etriti we kéreklik üskünilerni yollidi.

ereb birleshme xelipiliki 11 herbiy yük ayropilani bilen türkiyege izdesh-qutquzush, dawalash etriti, générator we shuninggha oxshash üskünilerni ewetti hemde ikki dala doxturxanisi qurush üchün heriketke ötti.

hindistandin kelgen 200 din artuq izdesh-qutquzush xadimi ghazianteptiki izdesh – qutquzush xizmetlirini dawamlashturuwatqan esnada, hindistan armiyesi hatayda dala doxturxanisi qurdi.

igilinishche, teywen rehbiri sey yingwin we hökümetning yuqiri derijilik emeldarliri bir ayliq maashlirini qahramanmarashta yüz bérip 10 wilayetke tesir körsetken yer tewreshtin kéyinki izdesh – qutquzush xizmetlirige yardem bérishke ajratqan.