dölet rehberliri shiwétsiyediki térrorluq herikitini eyiblidi

türkiye awazi radiyosi xewiri: türkiye muawin jumhur reisi fuat oktay twittérda bayanat élan qilip, stokholmda tarixiy hökümet binasi aldida toplanghan bölgünchi térrorluq teshkilati y p g|p k k qollighuchiliridin teshkillengen bir guruppining, jumhur reis rejep tayyip erdoghangha oxshitilghan bir qonchaqni bina aldidiki bir tüwrükke ésip qoyghanliqigha naraziliq bildürdi.

shiwétsiyede térrorluq teshkilati ezaliri teripidin türkiyeni we jumhur reis rejep tayyip erdoghanni nishan qilghan namayishni eyibligenliklirini eskertip, mundaq dédi:

«shiwétsiyening natogha eza bolush ramkisida bergen wedilirige emel qilishini, bu xil heriketlerge yol qoymasliqini ümid qilimiz. yüz bergen weqeler türkiyening yolluq endishelirini yene bir qétim dunya jamaetchilikige körsitip berdi. démokratik qanun döletlirining héchbiridin bu xil namayishlargha köz yumushini kütüshke bolmaydu. shiwétsiye dairilirining bundaq qobul qilghili bolmaydighan heriketlerni qilghan térrorluq guruppiliri we qollighuchiliri üstidin qanuniy jehettin sürüshte qilishni bashlishini ümid qilimiz.»

türkiye büyük millet mejlisi (parlaménti) bashliqi mustafa shentop shiwétsiyediki türkiyege qarshi ighwagerchilikler toghrisida toxtilip: «shiwétsiyening démokratiyege ochuq-ashkara tehdit salghan térrorluq herikitige ruxset qilghanliqini we köz yumghanliqini hergizmu qobul qilghili bolmaydu» dédi.

mustafa shentop naraziliqini bildürüp, shiwétsiye parlaménti bashliqi andrés norlénning 17-yanwardiki (2023) türkiye ziyaritini emeldin qaldurdi.

edliye ministiri bekir boztagh bolsa: «bu türkiye xelqige qilinghan hujum hésablinidu. bu térrorluq herikitige ruxset qilghan shiwétsiye hökümitini eyibleymen» dédi.

jumhur reislik mehkimisi bayanatchisi ibrahim qalin: «stokholmda jumhur reisimizge qarshi qilinghan qebih heriketni qattiq eyibleymiz» dédi.

jumhur reislik uchur-alaqe idarisining bashliqi fahrettin altun: «shiwétsiyediki p k k térrorluq teshkilati ezalirining türkiye we démokratiye yoli bilen hakimiyet béshigha kelgen jumhur reis erdoghanning hujum nishani qilinghanliqini shiddet bilen eyibleymiz» dédi.