aqar eliyéw teripidin qobul qilindi
ezerbeyjan pirézidénti ilham eliyéw türkiye jumhuriyiti dölet mudapie ministiri xulusi aqar we uning hemrahliqidiki türkiye armiyesi qomandanlar heyitini qobul qildi.
türkiye awazi radiyosi xewiri: ezerbeyjanning paytexti bakudiki pirézidént mehkimiside ishqa ashurulghan qobulda, aqar, ikki dölet otturisidiki qérindashliq munasiwetlirining, türk dunyasining büyük we danishmen rehbiri heyder eliyéw otturigha qoyghan «bir millet, ikki dölet» éngigha asasen barghanséri tereqqiy qilghan halda dawamlishiwatqanliqini eskertti, hemde 30 yilliq ashghaliyetke uda 44 kün dawamlashqan «wten urushi» arqiliq xatime bergen ezerbeyjanning «zeper küni» ni tebriklep mundaq dédi: «ezerbeyjan armiyesi uda 44 kün dawamlashqan <weten urushi> arqiliq ishghal astidiki zéminlirini azad qildi. bu arqiliq türklerning, mislisiz zeperlerni qolgha keltüreleydighan küchke, imkaniyetke we qabiliyetke ige ikenlikini pütkül jahangha namayen qildi.»
özgirishlerni yéqindin közitiwatqanliqlirini éytqan aqar, mundaq dep körsetti: «ezerbeyjanliq qérindashlirimiz bilen hemkarliqiqimizni izchil dawamlashturuwatimiz. herbiy telim - terbiye hemkarliqi, mesilichetchilik we dölet mudapiesi sanaiti saheliride birlik we barawerlik asasida heriket qilip, ortaq qararlarni chiqiriwatimiz.»
erméniyening ezerbeyjan bilen türkiyening birlikte sunghan tinchliq qolining ehmiyitini tonup yétishi we tégishlik qedemlerni tashlishining shert ikenlikini éytqan aqar, mundaq dep körsetti: «buning rayon üchün muhimliqini, bu shekilde kawkaz rayonining tinchliq we muqimliq rayonigha aylinalaydighanliqini erméniyeni öz ichige alghan hemme tonup yétishi lazim.»
ministir aqar, kéyinche ezerbeyjan dölet mudapie ministiri général zakir hesenow bilen bir yerge jem boldi.
aqar, ayrim we heyetler ara uchrishishlardin kéyin élan qilghan bayanatida, ikki dölet otturisidiki dostane we qérindashliq munasiwetlirining «bir millet, ikki dölet» éngigha asasen eng yüksek sewiyede dawamlishiwatqanliqini eskertip mundaq dédi: «türkiye bolush süpitimiz bilen, hazirghiche bolghinidek, buningdin kéyinmu ezerbeyjanliq qérindashlirimiz bilen mürini mürige tirep küresh qilishni adaqqiche dawamlashturimiz. herdaim ezerbeyjanning yénidimiz, ezerbeyjan héchqachan yalghuz emestur.»
ezerbeyjan dölet mudapie ministiri général zakir hesenow, ezerbeyjan we türkiye dölet mudapie ministirliqliri ara hemkarliqning barghanséri kücheygen halda dawamlishiwatqanliqini tekitlidi, hemde ezerbeyjanni qollighanliqi üchün aqargha minnetdarliq bildürdi.
