erdoghan niyu yorkta ikki tereplik uchrishishlirini dawamlashturdi
jumhur reis rejep tayyip erdoghan shimaliy qibris türk jumhuriyiti jumhur reisi ersin tatar, awistiriye pirézidénti aléksandér wan dér béllén we polsha pirézidénti andrzéj duda bilen bir yerge jem boldi.
türkiye awazi radiyosi xewiri: jumhur reis erdoghan, birleshken döletler teshkilatining 77 – nöwetlik omumiy kéngesh yighini ötküzülüwatqan niyu yorktiki türköyide ikki tereplik uchrishishlirini dawamlashturdi.
erdoghan, aldi bilen, shimaliy qibris türk jumhuriyiti jumhur reisi ersin tatar, awistiriye pirézidénti aléksandér wan dér béllén we polsha pirézidénti andrzéj duda bilen bir yerge jem boldi. andin, amérika kéngesh palata ezasi jemés rich, liwan bash ministiri nejib miyqati we engiliye bash weziri liz tras bilen körüshti.
uchrishishlar, axbarat wasitilirigha yépiq halette ishqa ashuruldi.
kéyinche, türkiyediki siyasiet, iqtisad we ijtimaiy tetqiqat fondi jemiyiti (SETA) uyushturghan yumilaq üstel yighinigha qatnashqan jumhur reis erdoghan, tashqi iqtisadiy munasiwetler kéngishi - türkiye-amérika soda kéngishi teripidin bérilgen kechlik tamaq ziyapitide nutuq sözlep, türkiye bilen amérika qoshma ishtatlirining chongqur dostluq munasiwetlirige ige ikki dost dölet, ittipaqdash we istratégiyelik hemrah ikenlikini qeyt qildi.
ikki döletning köp yönilishlik hemkarliqining dunyaning nurghun rayonlirida tinchliq we muqimliq ornitishta zor töhpilerni qoshuwatqanliqini eskertken erdoghan, ukrainadin tartip balqan rayonighiche, ottura sherq rayonidin afriqa qitesige bolghan keng jughrapiyede, énérgiyedin yémeklik bixeterlikigiche bolghan nurghun mesililerde oxshash qarashta ikenliklirini tekitlidi.
erdoghan, amérika qoshma ishtatliri pirézidénti jo baydin teripidin birleshken döletler teshkilatining 77 – nöwetlik omumiy kéngesh yighinigha qatnashqan rehberler we ularning repiqilirining sheripige bérilgen ziyapetke qatnashqandin kéyin, türkiyege qarap yolgha chiqti.
