pakistan bash ministiri soylu bilen qurumni qobul qildi
pakistan bash ministiri shahbaz shérif dölitimiz (türkiye jumhuriyiti) ichki ishlar ministiri sulayman soylu bilen muhit asrash we sheherchilik ishliri ministiri murat qurumni qobul qildi.
türkiye awazi radiyosi xewiri: shérif, qobulda qilghan sözide, türkiyening sel palakitining éghir zerbisge uchrighan dölitige yardem qolini sunushining dostluq we qérindashliqning namayendisi ikenlikini tekitlep mundaq dédi: «qimmetlik qérindishim hörmetlik jumhur reis rejep tayyip erdoghan, sel palakiti yüz bergen haman 27 – awghust küni manga téléfon qilip, hal soridi hem sel palakitide hayatidin ayrilghan minglarche xelqimiz üchün teziye bildürdi.»
sel palakitide hayatidin ayrilghanlar arisida 300 ge yéqin balilarningmu barliqini eskertken shérif, mundaq dédi: «türkiye xelqi herdaimqigha oxshashla pakistan xelqining yénida ikenlikini yene bir qétim namayen qildi. sel palakiti yüz bergen haman türkiyedin insanperwerlik yardemler yéghishqa bashlidi. bular hem hökümet yardemliri hemde türkiye xelqi teripidin ewetilgen yardemler idi.»
ichki ishlar ministiri sulayman soylu, sel palakitide yüz bergen deslepki kündin étibaren hem hawa hem quruqluq yoli arqiliq «qérindashliq köwrüki» salghanliqlirini eskertti, hemde bügün türkiye miqyasida 90 ming jamede oqulidighan jüme namizida pakistan xelqi üchün hem dua qilinidighanliqini, hemde pütkül türkiye xelqi teripidin yardem toplinidighanliqini tekitlidi.
muhit asrash we sheherchilik ishliri ministiri murat qurum, mundaq dédi: «türkiyede ishqa ashurghinimizdek, her qétimliq apettin kéyin qandaq heriketke ötsek, bügünmu dost we qérindash dölet pakistan xelqi we döliti üchünmu oxshash angning türtkiside bu yerdimiz.»
