5 – nöwetlik islamiy hemkarliq tenheriket musabiqisi bashlandi

türkiye awazi radiyosi xewiri: jumhur reis erdoghan, islamiy hemkarliq tenterbiye fédératsiyesi we islam hemkarliq tenheriket teshkilatigha eza döletlerning ishtirak qilishida konya sheherlik hökümitining tenterbiye sariyida ötküzülgen  5-nöwetlik islamiy hemkarliq tenheriket musabiqisining échilish murasimigha qatnashti.

erdoghan, murasimgha, ezerbeyjan pirézidénti ilham eliyéw, shimaliy qibris türk jumhuriyiti jumhur reisi ersin tatar, pelestin dölet reisi mehmud abbas, albaniye bash ministiri édi rama, aljiriye bash ministiri eymen bin abdurrahman, islamiy hemkarliq tenterbiye fédératsiyesi reisi shahzade abduleziz bin türki al feysel al suud qatarliqlar bilen birlikte ishtirak qildi.

murasimda, nutiqini  «nahayiti shepqetlik we méhriban allahning ismi bilen bashlaymen» dep bashlighan erdoghan, mundaq dédi: «5 – nöwetlik islamiy hemkarliq musabiqisi paaliyetlirini bashlitimen. bu paaliyetlerge töhpe qoshqanlarning hemmisini özüm we xelqim namidin qizghin tebrikleymen.»

5 – nöwetlik islamiy hemkarliq tenheriket musabiqisi échilish murasimi quran kerim tilawiti bilen bashlandi. dölet erkanlirining tenterbiye sariyigha kélishi bilen teng «istiqlal marshi» oquldi, arqidin türkiye bayriqi yuqiri kötürüldi.

kéyinche, musabiqige qatnashqan döletlerning ömekliri élipbe tertipe boyiche bayraqlirini lepildetken halda tenterbiye sariyigha kirip keldi.

islam dunyasining muhim muzikantliridin mahér zainmu 5 – nöwetlik islamiy hemkarliq tenheriket musabiqisining échilishi murasimida qisqiche konsért berdi.

chiragh nuri yorutush we étildaq  étish maharetliri körsitilgen musabiqe kéchilikide, ussulchilar sehnide her xil nomurlarni orunlidi. xelq oyunliri nomurliri  tamashibinlarning qizghin alqishigha érishti.