erdoghan: nato térrorchilargha chapan yapidighan teshkilat emes, bir bixeterlik teshkilatidur

türkiye awazi radiyosi xewiri: jumhur reis erdoghan bilen wénézuéla pirézidénti nikolas maduro tünügün paytext enqerediki jumhur reislik mehkimisi binasida ayrim we heyetler ara uchrishishlarni ötküzüp, kélishimlerge imza qoyush murasimigha ishtirak qilghandin kéyin, qoshma muxbirlarni kütüwélish yighini achti.

jumhur reis erdoghan bir muxbirning: «natogha ezaliq iltimasi sunup, türkiyening qollishigha éhtiyaji chüshken shiwétsiye we finlandiye rehberliri siz bilen körüshüshni telep qildimu? eger qilmighan bolsa, telep qilghan teqdirde sizning jawabingiz qandaq bolatti?» dégen soaligha jawab bérip: «aldi bilen shuni biliwélishimiz kérekki, nato térrorluqqa chapan yapidighan teshkilat emes, (belki) bir bixeterlik teshkilati. silergimu melum bolghinidek, shiwétsiye nöwette p k k, p y d / y p g gha oxshash térrorluq teshkilatliri erkin paaliyet élip bériwatqan bir döletke aylandi. hetta, bularning parlaméntliridimu térrorchilar bar, bu térrorchilar ularning parlaméntliridila bolidiken, bu térrorluq teshkilatliri stokholim kochilirida shiwétsiye saqchilirining himayisi astida kattibashlirining resimlirini kötürüp namayishlarni qilishni dawamlashturidiken we dölet igilikidiki téléwiziye qanilida térrorchilar kattibéshining söhbetliri tarqilidiken, biz ulargha <merhemet, dawamlashturuwéringlar> déyelmeymiz. <merhemet, natogha qétilinglar> déyelmeymiz. finlandiye üchünmu shundaq. epsuski, nöwette finlandiyedimu mushuninggha oxshash nurghun qurulmilar bar» dédi.

türkiyening, girétsiye bilen firansiyening natogha eza bolushi mesiliside bashtin kechürgenlirini shiwétsiye bilen finlandiyening ezaliq mesiliside bashtin kechürüshni xalimaydighanliqini bildürgen jumhur reis erdoghan: «girétsiye natodin ayrildi, uning qatnishishigha bizdin ilgirikiler yol qoydi. u natogha qayta kirdi. firansiyemu qaytidin kirdi. (netije) néme boldi? mana hazir 5+4, jemiy toqquz amérika bazisi qeyerde? girétsiyede quruldi. undaqta bu bazilar kimge qarshi quruldi? ular <rusiyege qarshi> dep jawab bérishiwatidu. eyibke buyrushmisun, biz buninggha aldanmaymiz» dégenlerni qeyt qildi.

wénézuéla pirézidénti maduromu,  türkiyening zor yoshurun küchke ige ikenlikini we dunyada intayin muhim rol oynawatqanliqigha isharet qilip: «biz mushundaq  oylaymiz emes, biz buni mushundaq körüwatimiz. türkiye intayin zor yoshurun küchke ige. u yéngidin tughuluwatqan dunyagha nisbeten chong yoshurun küch» dédi.