chawushoghlu: dost dölet wénézuélani dawamliq qollaymiz

türkiye awazi radiyosi xewiri: wénézuéla  pirézidénti nikolas maduroningmu ishtirak qilishida  ikki dölet otturisida bezi kélishimler imzalanghan murasimgha qatnashqan chawushoghlu, paytext karakastiki miraflorés sariyida ötküzülgen «3 – nöwetlik wénézuéla – türkiye ortaq hemkarliq komitéti yighini» ning yépilishida qilghan sözide, murasimgha qatnashqanliqi üchün wénézuéla  pirézidénti nikolas madurogha minnetdarliq bildürdi we jumhur reis rejep tayyip erdoghanning salimini yetküzdi, hemde maduroning eng qisqa waqit ichide türkiyede ziyarette bolushini kütüwatqanliqlirini qeyt qildi.

bu yighinning muhim netijilerning qolgha keltürülüshide türtkilik rol oynaydighan alahide munber ikenlikini eskertken chawushoghlu, komitét yighinida 7 türlük kélishim we ortaq bayanname imzalanghanliqini éytti.

maduroning türkiye ziyariti jeryanida saghlamliq, béliqchiliq we sayahet qatarliq sahelerde kélishim imzalashni xalaydighanliqlirini bayan qilghan chawushoghlu, türkiyening herqaysi organliri bilen zimmisige yüklengen mesuliyitini ada qilidighanliqini eskertish bilen bir waqitta, wénézuélada yéqindin buyan küchlük iqtisadiy tereqqiyatlarning körülüwatqanliqini, türkiyening ezeldin bir tereplime émbargolargha qarshi ikenlikini qeyt qildi, hemde wénézuélagha her daim ishinip hem wénézuélani izchil qollap kéliwatqanliqlirini tekitlep mundaq dédi: «bolupmu bu mezgilde, iqtisadiy sodimiz, 2021-yili aldinqi yilgha sélishturghanda texminen 300% ashti. arimizdiki musapining yiraq bolushigha qarimay, wénézuélaning éksportida türkiye bolush süpitimiz bilen birinchi orunda turimiz. aldinqi 3 aydiki sanliq melumatlargha qaraydighan bolsaq, 1.5 milyard dollarliq nishangha yétidighanliqimizni körüwalalaymiz.»

ministir chawushoghlu sözining axirida mundaq dédi: «wénézuélagha qaritilghan émbargolargha qetiy qarshi turidighanliqimizni yene bir qétim tekitlimekchimen. biz dost dölet wénézuélani dawamliq qollaymiz.»