qalin amérika siyasiy ishlar meslihetchisi nuland bilen körüshti
jumhur reislik mehkimisi bayanatchisi ibrahim qalin amérika qoshma ishtatliri tashqi ishlar ministirliqi siyasiy ishlar meslihetchisi wiktoriye nuland bilen bir yerge jem boldi.
türkiye awazi radiyosi xewiri: jumhur reislik mehkimisi bayanat ishliri ishxanisining bildürüshiche, qalin bilen amérika qoshma ishtatliri tashqi ishlar ministirliqi siyasiy ishlar meslihetchisi wiktoriye nulandning jumhur reislik mehkimiside ishqa ashurulghan uchrishishida, rusiye – ukraina urushini öz ichige alghan süriye, ezerbeyjan, erméniye we israiliye qatarliq rayonluq mesililer heqqide muzakire élip bérilghan, shundaqla, énérgiye bixeterliki, dölet mudapiesi hemkarliqi, türkiye – amérika siyasiy we iqtisadiy munasiwetliri közdin kechürülgen.
uchrishishta, istanbulda 29 – mart küni ötküzülgen rusiye – ukraina tinchliq söhbitining muzakirilerge ijabiy tesir körsitiwatqanliqi eskertilish bilen bir waqitta, rusiye – ukraina urushigha xatime bérilishini ishqa ashurush yolida türkiyening nahayiti muhim rol oynawatqanliqi tekitlengen.
türkiye terep, amérika terepke, jumhur reis rejep tayyip erdoghanning rehberlikide, türkiyening urush toxtitishni ishqa ashurush we insanperwerlik yardem karidorlirining échilishi yolida diplomatik teshebbuslirini izchil dawamlashturidighanliqini yetküzgen.
uchrishishta yene, türkiye – amérika qoshma ishtatliri istiratégiyelik méxanizmining yolgha qoyulushining tolimu xushallinarliq ehwal ikenliki, bu méxanizmning ikki terep munasiwetlirining tereqqiyatigha ijabiy tesir körsitidighanliqi qeyt qilinghan.
