oqtay küntertipki mesililer toghrisida toxtaldi
muawin jumhur reis oqtay bir xususiy téléwiziye qanilining neq meydan söhbet pirogrammisigha qatniship, kün tertiptiki mesililerge munasiwetlik soallargha jawab berdi.
türkiye awazi radiyosi xewiri: türkiye jumhuriyiti muawin jumhur reisi fuat oqtay, türkiye armiyesining iraq we süriyening shimalidin xelq we xewpsizlik küchlirige qilinidighan térrorluq hujumlirini bir terep qilish üchün 2 - féwral bashlighan «qish bürküti zerbe bérish herikiti»ning intayin ünümlük bir küresh bolghanliqini éytti.
u türkiyening térrorluqqa qarshi turush kürishi toghrisida toxtalghanda, derik, sinjar we karajaktiki térrorchilar uwilirining «qish bürküti» herikitining zerbisige uchrighanliqini bayan qilip: «bu intayin ünümlük küresh boldi. emeliyette, buning bilen toxtapmu qalmaydu, burunqigha oxshashla dawamlishidu» dédi.
fuat oqtay, emeliy meydanda daéshqa qarshi küresh qilghan, bu yolda eskerliri shéhit bolghan, minglarche térrorchini yerning astigha kömgen döletning türkiye ikenlikini eskertip: «biz hemishe bu rayonda daéshni eslige keltürüshke urunush heriketlirini körüp turuwatimiz. türkiyening meydani nahayiti éniq. térrorluq teshkilatliri déginimizde, daésh, p k k, uning gumashtisi p y d we fethullahchi térrorluq teshkilati qatarliqlarning arisida qandaq baghlinishlarning barliqini nahayiti éniq körimiz» dégenlerni qeyt qildi.
jumhur reis rejep tayyip erdoghanning ukraina ziyaritining intayin muweppeqiyetlik bolghanliqini bayan qilghan oqtay, türkiyening ukraina bilen rusiye otturisidiki kirizista söhbetlerge sahibxanliq qilalaydighanliqini jakarlighanliqini eskertip: «biz soda qilalaydighan we ortaq paranglishalaydighan ikki döletning (rusiye bilen ukraina) öz arisidiki saqliniwatqan mesililerni tinch yollar bilen hel qilishni ümid qilimiz» dédi.
girétsiyening qaidisiz köchmenlerni qaytishqa mejburlishi netijiside tonglap ölüp ketken 19 kishining weqesi toghrisida toxtalghan oqtay: «ipsalaning udulidiki merichtin qarshi qirghaqqa chiqqan kishilerning kiyimlirini, ayaghlirini éliwélip qar – yamghurluq hawada qayturuwétish, ularni qiyin – qistaqqa élishni qandaqmu insanliq dégili bolsun? bu ishlarni köchüshke, köchmenlikke qarshi küresh nami astida qiliwatisiler» dégenlerni sözlirige ilawe qildi.
