mewlut chawushoghlu afghanistan mesilisi üstide muhim söz qildi

türkiye awazi radiyosi xewiri: mewlut chawushoghlu pakistanning paytexti islamabadta afghanistandiki insanperwerlik weziyitini muzakire qilish üchün chaqirilghan islam hemkarliq teshkilati tashqi ishlar ministirliri kéngishining 17- nöwetlik pewquladde yighinida échilish nutiqi sözlidi.

mewlut chawushoghlu afghanistan xelqi bilen hemkarlishishning exlaqiy mesuliyet we diniy mejburiyet ikenlikini bildürüp, «hazir afghanistanda texminen 23 milyon kishi acharchiliqqa duch kelmekte. bu nopusning 60% ni teshkil qilidu. islam hemkarliq teshkilati choqum afghanistan üchün xelqaraliq qollashni herketke ötküzüsh we seperwer qilishta bashlamchiliq roli oynishi kérek» dédi.

chawushoghlu afghanistan iqtisadining yimirilishining aldini élish kéreklikini, dawamlishiwatqan émbargolarning maliye sistémisigha intayin éghir tesir körsetkenlikini tekitlep: «eger bu maliye menbesi afghanistan xelqige yetküzülmise, bergen wedilirimizning héchqandaq ehmiyiti bolmaydu. maliye menbelirige munasiwetlik hel qilish charisini derhal heriketke keltürüp, oborot we bankining yötkesh menbelirini mushu usulda hel qilishimiz kérek» dédi.

u yene insanperwerlik we iqtisadiy krizisning qoshna döletlerge bolghan köchmenler éqimi bésimi we yükini ashuruwetkenlikini, islam hemkarliq teshkilatining b d t panahlanghuchilar komissarliqi we xelqara köchmenler teshkilati qatarliq bashqa xelqaraliq teshkilatlar bilen hemkarliship, köchmenlerni dawamliq qollishi kéreklikini tekitlidi.

chawushoghlu afghanistanda taliban hökümiti bilen hemkarlishishning muqimliqni ornitishta intayin zörür ikenlikini otturigha qoyup, «hazirqi hökümetni hemmini quchaqliyalaydighan, hemmeylenning heq - hoquqini qoghdaydighan hemde shuning bilen bir waqitta ayallar bilen qizlarning ishqa orunlishish we oqush pursitini kéngeyteydighan bolishi üchün qollashni dawamlashturishimiz shundaqla bu yönilishte telqinlerde bolishimiz lazim» dédi.

bu dairide élan qilinghan barliq ijabiy bayanlar we qedemlerni intayin muhim dep qaraydighanliqini bayan qilip, bularning taliban hökümitining dölet ichi we sirtidiki qanunluq salahiyitini shundaqla küchini ashuridighanliqini bildürdi.

chawushoghlu afghanistandiki künséri éghirlishiwatqan krizisning asiyadiki musulman döletlerge intayin selibiy tesir körsetkenlikini tekitlep yene mundaq dédi: «asiya döletlirining, pakistan, iran, özbékistan, türkmenistan, hindonéziye we malaysiya qatarliq barliq döletlerning afghanistan mesilisige aktip qatnishishini intayin muhim dep qaraymiz. biz choqum téximu köp qedem tashlishimiz we  islam jemiyiti bolush süpitimiz bilen rehberlik rolini jari qildurushimiz kérek. islam hemkarliq teshkilati tashqi ishlar ministirlirining kabulgha qilidighan bir ziyariti arqiliq afghanistanliq qérindashlirimizgha bolghan hemkarliqimizni körsiteleymiz. uchurlirimizni shu yerge biwasite yetküzüsh arqiliq islam döletliri süpitide yétekchi rol oyniyalaymiz.  sözlirimni xulasileshtin burun, paytexti quddus sherip  bolghan musteqil pelestinni berpa qilishtiki qetiy iradimiz we qollishimizni tekitlimekchimen. qedirlik qérindashlirim! afghanistanliq qérindashlirimizning téximu güzel kelgüsige layiq ikenlikige ishinimen, biz hazir heriketke ötishimiz kérek»