shentop parlamént diplomatiyesi we hemkarliqlirining muhim ehmiyetke ige ikenlikini éytti

türkiye awazi radiyosi xewiri: türkiye büyük millet mejlisi (parlaménti) bashliqi mustafa shentop ispaniye paytexti madridta ötküzülgen parlaméntlar ara ittipaq 143-nöwetlik omumiy kéngishi ramkisida 120 ezagha ige ittipaq tüzmeslik herikiti parlaméntlar tori yighinida söz qildi.

u ittipaq tüzmeslik herikitining xelqaraliq tengpungluqlarni adaletke yüzlendürüsh, tinchliq, barawerlik, özara hemkarliq we bext-saadetke tolghan dunya berpa qilish üchün hesse qoshushta muhim yoshurun küchke ige ikenlikini eskertip, mezkur teshkilatning ezerbeyjanning nöwetchi reislikide rolini téximu yaxshi jari qildurup, dunyagha yaxshi tonilidighanliqini qeyt qildi.

u: «xelqara sehnilerde oxshimighan her xil awazlarning bolushigha, burunqidin téximu köp éhtiyajliq bolghan mezgilni bashtin kechürüwatimiz. acharchiliq, kembeghellik, insaniyetke qarshi ötküzülgen jinayetler we quddusning salahiyitige oxshash dunyawi ehmiyetke ige mesililerge uzun muddetlik hel qilish chariliri tépish, peqet ochuq-ashkara talash-tartish qilish we muresse bilenla mumkin bolidu» dédi.

u wabaning tarqilishining adaletsizliklerni aldigha chiqarghanliqini eskertip: «waksina we tibbiy matériyallar bilen teminlesh nuqtisidin ayrimichiliq qilish we bir terepke yanbésishlar sewebidin nurghun tereqqiy qiliwatqan döletler yaki tereqqiy qilalmighan döletler asasiy dawalash éhtiyajlirini teminleshte qiynaldi. bu jehette iptixarliq bilen éytimenki, türkiye özige kelgen her xil tibbiy yardem telipige jawab qayturdi we pütkül imkaniyetlirini semimiy halda barliq éhtiyajliq döletlerning éhtiyajini qamdash üchün seperwerlikke keltürdi» dédi.

u türkiyening wabagha qarshi küreshte yardem telep qilghan her döletke yardem qilishqa tirishqanliqini, axirqi basquchqa kélip qalghan türk waksinasini normal ishlepchiqirish bashlanghanda éhtiyajliq döletler bilen ortaqlishishqa teyyar ikenlikini qeyt qildi.

u hazirghiche sewebi bilinmigen iqtisadiy kirizis we wabaning, xelqara munasiwetler, tengpungluqlar we ittipaqlarni tewretkenlikini eskertip: «kilimat kirizisi we qurghaqchiliqqa oxshash tehditlerni nezerge alghinimizda, teminlesh zenjirliride yüz bergen mesililerge qoshumche aldimizdiki mezgillerde yémek-ichmek qiyinchiliqining yüz bérish éhtimali küchlük. bu ehwal dunyadiki barawersizliklerni chongqurlashturup, musapirlar bilen köch dolqunining éshishigha seweb bolidu» dep agahlandurdi.