chawushoghlu afghanistanda qurulidighan hökümetni étirap qilish mesilisi toghrisida bayanat berdi
dölitimiz (türkiye jumhuriyiti) tashqi ishlar ministiri mewlüt chawushoghlu, türkiyening afghanistanda qurulidighan hökümetni étirap qilish mesiliside xelqara jemiyet bilen birlikte heriket qilidighanliqini éytti.
türkiye awazi radiyosi xewiri: ministir chawushoghlu paytext enqere muxbirlarning afghanistan weziyiti toghrisidiki soallirigha jawab berdi؛ türkiyening afghanistandiki türk puqraliri bilen téléfonda bir-birlep alaqileshkenlikini bildürgen chawushoghlu, qaytishni telep qilghan puqralarni türkiyege élip kélishke tirishiwatqanliqlirini éytti.
u, enqerening bashqa döletlerning tarqaqlashturush xizmetlirigimu yardem qiliwatqanliqini tilgha élip: «nurghun döletler bizge iltimas qilmaqta, biz türkiyening u yerdiki rolini jari qilduruwatqan eskerlirimizge rehmet éytimiz» dégenlerni qeyt qildi.
chawushoghlu «talibanlar bilen alaqe qandaq ornitilidu, taliban wekilliri bilen körüshtünglarmu?» dégen soalgha, «ular kabulgha kirishtin burun talibanning siyasiy qanitini türkiyege teklip qilghaniduq» dep jawab berdi.
jumhur reis rejep tayyip erdoghanning tünügün bir téléwiziye söhbet pirogrammisida özining taliban wekilliri bilen körüshüshining mumkinlikini éytqanliqini xatirilitip ötken chawushoghlu, sözini dawamlashturup: «bizning oxshimighan yollardin alaqimiz bar, meyli kabul, meyli doha arqiliq bolsun alaqe qiliwatimiz, alaqe bolushi kérek» dédi.
afghanistandiki hökümet teshkillesh tirishchanliqi we teshkillinidighan hökümetni étirap qilish mesilisi toghrisida toxtalghan chawushoghlu, aldi bilen hökümetning qandaq teshkillinidighanliqini körüsh kéreklikini tekitlidi.
bu mesilige bildürülidighan pozitsiye we bu heqte élan qilinilidighan bayanatlarning oxshash bolushigha kapaletlik qilish üchün barliq döletler bilen söhbetleshkenliklirini bildürgen chawushoghlu: «ular <sighdurushchan hökümet qurimiz> dewatidu. biz (u hökümetning) heqiqiy menide sighdurushchan yaki emeslikini bilishimiz kérek. biz xelqara jemiyet bilen birlikte heriket qilimiz. élan qilidighan bayanatlirimizmu, tashlaydighan qedemlirimizmu maslashturulidu. jüme küni shimaliy atlantik ehdi teshkilati – nato tashqi ishlar ministirliri yighini bar. xelqara jemiyet bilen mas heriket qilishimiz lazim. nöwette aldin qarar chiqirish toghra emes» dégenlerni sözlirige ilawe qildi.
