chawushoghlu: sherqiy jenubiy yawropa kiriziske hel qilish charisi tépish yolida izdiniwatidu
tashqi ishlar ministiri mewlüt chawushoghlu nöwette saqliniwatqan mesililerge diyalog arqiliq hel qilish charisi tépish yolida izdiniwatqan bir sherqiy jenubiy yawropa barliqini éytti.
türkiye awazi radiyosi xewiri: bu yil türkiyening nöwetchi reislikide chaqirilghan sherqiy jenubiy yawropa hemkarliq musapisi dölet we hökümet bashliqliri yighini, tashqi ishlar ministiri mewlüt chawushoghluning sahibxaniliqida tashqi ishlar ministirliri yighini bilen bashlandi.
chawushoghlu, yighinning échilishida qilghan sözide, bu yil birla waqitta sherqiy jenubiy yawropa hemkarliq musapisining 25 – yilliqini tebriklewatqanliqlirini tekitlep mundaq dédi: «nöwette saqliniwatqan mesililerge diyalog arqiliq hel qilish charisi tépish yolida izdiniwatqan bir sherqiy jenubiy yawropa bar, rayonning eng keng dairilik munbiri bolghan sherqiy jenubiy yawropa hemkarliq musapisi, eng musheqqetlik zamanlardimu rayon döletlirini bir yerge jem qilalighan bir munber boldi.»
türkiye 3 – qétim nöwetchi reislik wezipisini öz üstige alghan mezgilde 40 tin artuq paaliyet élip bérilghanliqini, hemde tunji qétim chaqirilghan diaspora we yashlar munbiri yighinlirining muhim paaliyetler qataridin orun alidighanliqini eskertken chawushoghlu, bu basquchta, «2023 – yilliq istiratégiye höjjiti» ning teyyarlinishiningmu muhim bir qedem ikenlikini, rayonning yawropa – atlantik teshkilatliri bilen bir gewdilishishige nahayiti zor ehmiyet béridighanliqlirini hemishe tekitlep kéliwatqanliqlirini qeyt qilip mundaq dédi: «sherqiy jenubiy yawropa hemkarliq musapisi döletlirining yawropa ittipaqigha ezaliqi nuqtiinezerlirining kücheytilishi ortaq nishanimizdur. sherqiy jenubiy yawropa döletlirining hemmisi eza bolghandila, andin yawropa ittipaqi yer shari xaraktérlik aktiyorgha aylinalishi mumkin.»
nöwetchi reisliki esnasida türkiyeni qollighanliqi üchün, sherqiy jenubiy yawropa hemkarliq musapisi döletlirige minnetdarliq bildürgen chawushoghlu, sherqiy jenubiy yawropa hemkarliq musapisining kéler qétimliq nöwetchi reisi girétsiyege muweppeqiyet tilidi, hemde atinani her jehettin qollaydighanliqlirini qeyt qildi.
u yene, 2022 – 2023 – yilliri nöwetchi reislik wezipisini qobul qilghan (qaratagh) podgoritsayaghimu minnetdarliq bildürdi.
sherqiy jenubiy yawropa hemkarliq musapisi dölet we hökümet bashliqliri yighini bolsa, chüshtin kéyin jumhur reis rejep tayyip erdoghanning ishtirak qilishida ishqa ashurulidu.
