türkiye paraxoti nigériyede déngiz qaraqchilirining hujumigha uchridi
nigériye déngiztewelikide déngiz qaraqchilirining hujumigha uchrighan türkiye paraxotida ezerbeyjanliq bir neper paraxot xadimi öltürüldi.
türkiye awazi radiyosi xewiri: istanbuldiki bir shirketke tewe mozart isimlik türkiye paraxotining gwiniye qoltuqida sao tomédin 100 déngiz mili yiraqliqta hujumgha uchrighanliqi élan qilindi.
shirketning bayanatida, nigériyening lagos shehiridin jenubi afriqaning kep town shehirige qarap yolgha chiqqan paraxottiki 19 xadimdin birisining öltürülgenliki, 15 xadimning tutup kétilgenliki, 3 xadimning bolsa, déngiz qaraqchiliri bilen birge paraxotta ikenliki bildürüldi.
türkiye tutqun qilinghan xadimlarni qutquzush üchün heriketke ötti.
jumhur reis rejep tayyip erdoghan paraxotning 4-kapitani furqan yaren bilen téléfonda körüshüp, weqening tepsilati we paraxottiki ehwallardin melumat aldi. paraxotning hujumdin aman qalghan 3 xadimi bilen birge gabongha qarap mangghanliqi toghrisidiki uchurni tapshuruwalghan erdoghan, weqening jeryanini yéqindin közitiwatqanliqini, tutup kétilgen paraxot xadimlirini qutquzush toghrisida munasiwetlik mesullargha yolyoruq bergenlikini bildürdi.
tashqi ishlar ministiri mewlut chawushoghlumu kapitan furqan yarendin bashqa yene paraxot igidarchiliqidiki shirketning bashliqi osman lewent karsan bilen téléfonda körüshti. teziye we hal sorash tileklirini yetküzüp, tutup kétilgenlerni qutquzush we baldurraq öylirige bixeter qaytishini ishqa ashurush üchün zörür bolghan tedbirlerni qollinidighanliqlirini tekitlidi.
mewlut chawushoghlu yene ezerbeyjan tashqi ishlar ministiri jeyhun bayramowghimu téléfon qilip, öltürülgen paraxot xadimi üchün teziye tileklirini yetküzdi we paraxot yétip kelgende, jinazisini ezerbeyjangha yötkesh xizmetlirini derhal bashlaydighanliqlirini bildürdi.
türkiye, ebuje, nigériye qatarliq etraptiki döletlerde turushluq elchixanilarni tutup kétilgen xadimlarni qutquzush üchün seperwer qildi.
