erdoghan: yerlik menbelerge tayinidighan énérgiye sahesi shekillendürimiz
jumhur reis rejep tayyip erdoghan imkaniyetning bariche yerlik menbelerge tayinidighan bir énérgiye sahesi shekillendürüshni nishan qiliwatqanliqlirini éytti.
türkiye awazi radiyosi xewiri: jumhur reis erdoghan, istanbuldiki «wahdettin sariyi» din neq meydan ulinishi arqiliq manisa énérgiye we tebiiy bayliqlar layihelirini omumyüzlük ishqa kirishtürüsh murasimigha qatnashti, hemde bu yerde qilghan sözide, 2002 – yili hakimiyetni ötküzüwalghandin buyan, türkiye jumhuriyiti tarixidiki eng muweppeqiyetlik 18 yilini yashatqanliqlirini tekitlep mundaq dédi: «biz hakimiyet béshigha chiqishtin burun peqet 5 chong shehirimizdila tebiiy gaz bar idi, emdilikte bolsa 81 shehirimizning hemmisini tebiiy gaz bilen teminlesh nishanigha yettuq.»
türkiye miqyasida tebiiy gaz bilen teminlesh layihesige sélinghan mebleghning 27 milyard liragha yétidighanliqini qeyt qilghan jumhur reis erdoghan, mundaq dep körsetti: «2021 – yilimu tebiiy gaz sahesige meblegh sélishni izchil dawamlashturimiz.»
hazirghiche köpligen musibelerni bashtin kechürgenliklirini éytqan jumhur reis erdoghan, nurghun tosalghularni pachaqlap tashlighanliqlirini, türlük – türlük hujumlargha duch kelgenliklirini eskertip mundaq dédi: «türkiyening zawal tépishini, kirizis we qalaymiqanchiliq patqiqigha ittirilishini xiyal qilidighanlargha qilche pisent qilmastin, dölitimizni istiqbali parliq bir kélechekke teyyarlawatimiz.»
türkiyening 2002 – yili aran 18 mégawat bolghan géotérmal küchining bügünki künde 1613 mégawatqa yetkenlikini tekitligen erdoghan, mundaq dédi: «bu reqem bilen géotérmal saheside türkiyening derijisi yawropa boyiche birinchi, dunya boyiche tötinchi orungha yükseldi. <musteqil énérgiyege ige qudretlik bir türkiye> shoari astida imkaniyetning bariche yerlik menbelerge tayinidighan bir énérgiye sahesi shekillendürüshni nishan qiliwatimiz. türkiyening qudret tépishi üchün zadi kem bolsa bolmaydighan éléktron qurulmiliq küchimizni 18 yilda 3 hesse zoraytip, 96 ming mégawatqa yetküzduq. peqet ishlepchiqirish sahesidila emes, sijil énérgiye téxnologiyeliridimu merkiziiy küch bolushni nishan qiliwatimiz.»
