erdoghan: hazirqi dunya tertipi dawamlishalmaydu

türkiye awazi radiyosi xewiri: rejep tayyip erdoghan jumhur reislik sariyida 12-qétimliq bash elchiler konféransida söz qildi.

u bash elchilerning bu yil (2020) derijidin tashqiri muhim wezipilirini ada qilishtin bashqa, yéngi esirning eng chong sehiye kirizisi bolghan wuxen wirusi (Kovid-19) gha qarshi küresh qilishqa mejbur bolghanliqini eskertti.

u, bu mezgilde iqtisadiy nuqtidin intayin küchlük döletlerning sehiye ul-eslihelirining qanchilik ajiz ikenlikining körülgenlikini bildürüp, türkiyening bu musapidin imtihandin muweppeqiyetlik ötüp ketkenlikini tekitlidi.

u toghrining ornigha küchlükni, köp sanliqning ornigha bir siqim az sanliqni, kembeghelning ornigha bayni qoghdaydighan hazirqi mewjut dunya tertipining dawam qilishining mumkin emeslikini qeyt qildi.

u xelqara munasiwetlerde köp merkezchilikke yüzlinishning we rayonlishishning barghanséri muhim ehmiyetke ige ikenlikini bildürüp, mundaq dédi:

«teminlesh zenjirliri yéngidin bölüshülgen, ishlepchiqirish we tiransiport merkezliri tekrar békitilgen, yéngi rayonluq ittipaqdashlar qurulghan, siyasiy we iqtisadiy sahe qaytidin shekillengen bir burulush nuqtisida turuwatimiz. dölitimizni we xelqimizni pushayman qildurmasliq üchün qetiy qarargha igimiz. dölitimizning yéngi mezgilning qurghuchi iradiliridin biri bolushi üchün pütün küchimiz bilen tirishimiz.»

u künimizde liwiyede siyasiy hel qilish ümidliri qaytidin yashnighan bolsa, buningda türkiyening waqtida heriket qilishining muhim hessilerni qoshqanliqini eskertip: «sherqiy aqdéngizdiki her xil özgirishlerning yükini zimmisige alghan dölitimizning, tebiiy bayliqlar tilgha élinghanda, yoq hésablinishigha razi bolmiduq. pat yéqinda sherqiy aqdéngizdiki qédérip-tekshürüsh paaliyetliri toghrisida xush xewerlerni anglaydighanliqimizgha ishinimen» dédi.

u yawropa ittipaqining türkiyeni özidin yiraqlashturidighan istratégiyelik korluqtin baldurraq qutulushini ümid qilidighanliqini bildürdi.

shushaning erméniyening ishghalidin azad qilinishi bilen xushalliq ümidlirining kücheygenlikini bildürüp, taghliq qarabaghdiki ishghal axirlashqiche küresh bayriqining chüshmeydighanliqini tekitlidi.

u islam düshmenlikining dölet bashliqliri sewiyeside ilhamlanduruluwatqanliqini we qollashqa érishiwatqanliqini bildürüp: «islam düshmenlikige qarshi küresh qilish, hem étiqadimizning hemde chet ellerdiki puqralirimizgha bolghan mesuliyitimizdur» dédi.