türkiyening yuqiri derijilik emeldarliri girétsiye gézitning qopalliqigha inkas qayturdi

türkiye awazi radiyosi xewiri: türkiye büyük milliy mejlisi (parlaménti) bashliqi mustapa shentop girétsiye gézitining jumhur reis rejep tayyip erdoghangha qarshi mawzusigha inkas qayturdi.

mustapa shentop ijtimaiy alaqe tori tiwittérdiki adrési arqiliq bayanat bérip, «bu exlaqsizliqni qattiq eyibleymen, peskeshlikning siyaset emeslikini, peqet uni qilghan we qildurghanlar bashtin kechürüwatqan we layiq bolghan turmush usulining körsetküchi ikenlikini eskertishni xalaymen. türkiye bolush süpitimiz bilen mustesnasiz halda barliq sahelerde tégishlik sawaqni bérish qudritige igimiz. hörmetlik rejep tayyip erdoghan jumhur reisimizdur, bash qomandanimizdur» dédi.

jumhur reis yardemchisi fuat oqtaymu girétsiye gézitining qopalliqigha ijtimaiy alaqe toridiki adrési arqiliq inkas qayturup, «girétsiyediki atalmish bir ​​gézitning hörmetlik jumhur reisimizge qilghan ne pikir erkinliki, ne axbarat exlaqigha yarashmaydighan edebsizliki, sherqiy aqdéngizda tinchliqning ornigha urushni, yarishishning ornigha qalaymiqanchiliqni qoyushni nishan qilghan yaman niyetning eks étishi, rayondiki ighwagerchilikning mehsulidur» dédi.

edliye ministiri abdulhemit  gül bolsa tiwittérda élan qilghan bayanatida, «girétsiye dairiliri bu qopalliq we jinayetke shérik bolmasliqi, qanunning körsetmilirini derhal ijra qilishi kérek» dégenlerni qeyt qildi.