erdoghan bilen yildirim qurultay zalining aldida partiye mensuplirigha qisqila söz qildi
jumhur reis rejep tayyip erdoghan bilen bash ministir binali yildirim, adalet we tereqqiyat partiyesining 3 - nöwetlik chong qurultiyi ötküzülidighan zalgha yétip keldi...
türkiye awazi radiyosi xewiri: bügün adalet we tereqqiyat partiyesi üchün tarixiy kün... adalet we tereqqiyat partiyesining bügünki 3 – nöwetlik chong qurultiyida, jumhur reis rejep tayyip erdoghan aridin 998 kün ötkendin kéyin qaytidin özi qurup chiqqan partiyening bashliqliq wezipisini ötküzüwalidu.
adalet we tereqqiyat partiyesi 21 – maydin étibaren yene bir qétim erdoghan dewrige qedem qoyidu.
jumhur reis erdoghan bilen bash ministir binali yildirim qurultay ötküzülidighan enqere tenterbiye zalining aldigha toplanghan kishilerge salam berdi we qisqila söz qildi؛ sözini «qimmetlik seperdishim, hörmetlik binali yildirim ependi, söyümlük seperdashlirim! silerge 998 kündin kéyin eng chongqur tuyghular bilen salam bérimen. emeliyette ayrilghan bolsaqmu, bügün siler bilen birgimiz» dep bashlighan jumhur reis erdoghan, amanetni yeni partiyening bashliqliq wezipisini bügünlergiche élip kelgen binali yildirimgha minnetdarliq bildürdi.
2019 – yilida mehelliy saylamlarning, 2019 – yili noyabirda parlamént we jumhur reislik saylamlirining ötküzülidighanliqini xatirilitip ötken erdoghan, «toxtash yoq, yolgha dawam. ishikmu ishik aylinishni dawamlashturimiz. üstimizdiki gep – sözlerni sanduqta jawab bérip yoqitimiz» dédi.
bash ministir binali yildirimmu, adalet we tereqqiyat partiyesi qurultaylirining bir bayram keypiyati ichide ötidighanliqini eskertken halda, «adalet we tereqqiyat partiyesi teshkilati mensupliri bolush süpitimiz bilen, piraq didargha érishken lehzilerni bashtin kechürmektimiz. hörmetlik jumhur reisimiz xosh keldingiz» dédi.
yuqiriqi sözlerni qilghandin kéyin zalgha birlikte kirgen jumhur reis erdoghan bilen binali yildirim partiye mensuplirigha salam berdi.
partiye bashliqi saylinidighan bügünki qurultayda partiyening nizamnamisigha özgertish kirgüzüsh mesililirimu muzakire qilinidu. partiyening rehberlik apparatigha alaqidar belgilimisige «muawin partiye bashliqi» belgilimisi ilawe qilinidu. shuning bilen, bash ministir binali yildirim, adalet we tereqqiyat partiyesining «muawin partiye bashliqi» bolidu.
rabie ishariti arqiliq ipadiliniwatqan «bir millet, bir weten, bir dölet we bir bayraq» pikrimu adalet we tereqqiyat partiyesi nizamnamisigha kirgüzülidu.
