«türkiye xelqi döletning menpeetlirini qoghdashqa ashiq»
bash ministir yildirim türkiye xelqining döletning menpeetlirini qoghdashqa ashiq ikenlikini éytti.
türkiye awazi radiyosi xewiri: yildirim asasiy qanunni özgertish teklipining türkiye büyük millet mejliside testiqlinishidin kéyin omumiy kéngeshke xitab qilip, rehmet éytti.
türkiye xelqining eng toghra qararni béridighanliqini tekitligen yildirim mundaq dédi: «eslide asasiy qanunni özgertish hoquqi xelqimizning qolida. shunga bu ishni öz sahibigha hawale qilimiz. emdi nöwet xelqimizning qarar bérishige keldi. xelqimizmu eng toghra qararni béridu. shuni alahide tekitlep ötimenki, türkiye xelqi döletning menpeetlirini qoghdashqa ashiqtur. türkiye xelqidek jasaret abidesining bir ezasi bolush hemmimiz üchün mislisiz shan – shereptur. eziz xelqimiz bu mejlisni 1920 yili qurghanidi. chünki musteqilliqini biwasite özi qazanghanidi. shunga jumhuriyetke sahib chiqip, tedrijiy tereqqiy qildurup, bügünki künge élip keldi.»
türkiye xelqining 15 – iyul kéchisi türkiye büyük millet mejlisi bilen birlikte döliti hem hökümitini jan tikip qoghdighanliqini, pütkül jahanning türkiye xelqining jasaritige heyran qalghanliqini tekitligen yildirim mundaq dédi: «xelqimiz jumhuriyet qurulghandin buyan ötküzülüp kéliwatqan her bir saylamda eng toghra qararni berdi. shunga asasiy qanunni özgertish mesilisidimu eng toghra qararni béridu. derweqe, xelqimizning qarari eng toghra qarar bolidu. jümlidin xelqimiz némining eng yaxshi ikenlikini nahayti obdan bilidu.»
