engliye parlaméntida 15-iyul herbiy isyani muhakime qilindi

türkiye awazi radiyosi xewiri: engliye parlaméntining töwen qaniti hésablinidighan awam palatasi chirchil zalida, siyasetchiler, akadémiklar we oqughuchilarni öz ichige alghan nurghun kishi qatnashqan «15-iyul türkiyediki herbiy-siyasiy özgirish qozghashqa urunush herikiti: weqeler we heqiqetler» témisida léksiye yighini uyushturuldi. yighinda, «kündilik sabah géziti» ning yazghuchisi meryem ilayda atlas söz qilip, türkiye xelqining özliri üchün tiragédiyelik kéche bolghan 15-iyulda démokratiyeni qoghdash iradisini namayan qilghanliqini bildürdi. u 15-iyulning türkiyediki herbiy-siyasiy özgirish tarixida muhim burulush nuqtisi bolghanliqini eskertti.

«kündilik sabah géziti» ning ston yazghuchisi burhanettin duran herbiy-siyasiy özgirish qozghashqa urunghan fethullahchi térrorluq teshkilatining, xelqning démokratiyeni we dölitini jan-jehli bilen qoghdaydighanliqini texmin qilalmighanliqini, türk xelqini oylashmighanliqini tekitlidi.

mezkur gézitning iqtisad mudiri we ston yazghuchisi sheref oghuz herbiy-siyasiy özgirish qozghashqa urunush herikiti we uningdin kéyin, türk xelqining qolida tömürning sunuqimu bolmighan halda tankilargha qarshi turup, hayatini xeterge ittiripla qalmastin, iqtisadiy jehettimu küchlük inkas qayturghanliqini bildürdi.

sheref oghuz mundaq dédi:

«jiddiy halet bolushigha qarimay, kishiler we shirketler üchün éytqanda, kündilik turmush burunqidek dawamlishiwerdi. ministirlar xizmet pilanlirini özgertmidi.»

sheref oghuz herbiy-siyasiy özgirish qozghash herikiti yüz bérip, uzun ötmeyla kishilerning 9 milyard dollarni türk lirasigha almashturghanliqini qeyt qildi.

sabah géziti teripidin qurulghan «sabah yazghuchilar kulubi», gherb dunyasini 15-iyulgha munasiwetlik toghra chüshenchige ige qilish, chet ellerde türkiyege qarshi qanat yayduruluwatqan xata teshwiqatlargha qarshi küresh qilish meqsitide, londondin kéyin mushu ay ichide washingtonda, dékabir éyida biryussélda we yanwarda bérlinde léksiye yighinlirini uyushturidu.