türkiye parlaménti herbiy - siyasiy özgirish qozghash teshebbusigha qarshi bayanname élan qildi

türkiye awazi radiyosi xewiri: türkiye büyük millet mejlisi bashliqi ismail qahraman teripidin oqulghan bayanname töwendikiche:

«biz adalet we tereqqiyat partiyesi, jumhuriyet xelq partiyesi, milliyetchi heriket partiyesi we xelqlerning démokratik partiyesining parlaménttiki guruppiliri bolush süpitimiz bilen, eziz xelqimizge, milliy iradige, dölitimizge, bolupmu xelqimizning iradisining wekilliri bolghan parlamént ezalirigha we ghazi mustafa kamalning mejlisige 15 – iyul kéchisi bashlanghan we 16 – iyul tang seherde tarmar qilinghan herbiy - siyasiy özgirish qozghash teshebbusini we parlaméntqa qilinghan hujumlarni qattiq eyibleymiz. eziz xelqimiz mürini - mürige tirep küresh qilip, herbiy - siyasiy özgirish qozghash teshebbusigha dadilliq bilen qarshi chiqip, bir qisim unsurlarning hakimiyetni tartiwélishigha yol qoymidi. türkiye jumhuriyiti we dölet organlirini jan tikip qoghdighan eziz xelqimizni qanchilik maxisaaqmu azliq qilidu. dölitimiz we xelqimizni qoghdash yolida shéhit bolghanlardin pütkül xelqimiz intayin minnetdar bolup, ularning qehrimanlarche ish – izlirini ebedilebed untumaymiz. türkiye büyük millet mejlisi eziz xelqimiz bergen hoquqqa asasen bomba hujumliri we oq yamghurliri astida wezipe ötesh arqiliq yene bir qétim xelqimizge layiq bir mejlis ikenlikini namayen qildi. mejlisimiz herbiy - siyasiy özgirish qozghash teshebbusigha qarshi mürini - mürige tirep küresh qilish arqiliq özining mislisiz alahidilikini jari qildurdi. bu nuqtidin élip éytqanda, mejlisimizning herbiy - siyasiy özgirish qozghash teshebbusigha qarshi tutqan pozitsiye nahayiti zor ehmiyetke ige. mejlisimizning bu pozitsiyesi démokratiyeni téximu ilgiri sürüsh jehettin intayin muhim. pütkül xelqimiz shuni bilishi kérekki, bügünkige oxshashla kelgüsidimu xelqimizge, milliy iradige, ghazi mustafa kamalning mejlisige xiris qilghuchilargha tégishlik jawab qayturidu. türkiye büyük millet mejlisi démokratiyening igilmes – sunmas iradisini adaqqiche jari qilduridu. mejlisimizdiki barliq siyasiy partiyelerning guruppilirining herbiy - siyasiy özgirish qozghash teshebbusigha qarshi tutqan ortaq pozitsiyesi we qetiy iradisi tarix sehipiliridin menggülük orun alidu. bu ortaq pozitsiye milliy irade we xelqimizni téximu kücheytidu. mejlisimiz wezipe üstide bolup, xelqimizning mejlisige, xelqqe we xelqning igilik hoquqigha ziyan yetküzüsh nishan qilinghan bundaq hujumlarni élip bérishqa urunghuchilargha qanun dairiside eng éghir bedel töletküzidu. hemme ishning burunqidek bolmaydighanliqining eng roshen delili mana bu ortaq bayannamidur. 4 partiyening qarashliri oxshash bolmisimu, hemmimiz barliq parlamént ezalirimiz we barliq ammiwi teshkilatlirimiz bilen birlikte milliy iradige sahib chiqimiz, milliy iradige ebedilebed sahib chiqimiz. bu heqte xelqimiz könglini toq tutsun. eziz xelqimizning démokratik inkas qayturush chégraliridin halqip kétidighan, dölitimizge yarashmaydighan zorawanliq heriketliridin özlirini chetke élishigha tilekdashmiz. shéhitlirimizni chongqur hörmet we cheksiz iptixarliq tuyghusi ichide yad étimiz, yaridarlirimizgha allah taaladin shipaliq tileymiz, eziz xelqimizge ésenlik tileymiz. türkiyeni qollap bayanatlarni élan qilghan barliq dost we qérindash döletlerge chin dilimizdin rehmet éytimiz, qizghin salam yollaymiz.»

bayannamige imza qoyghuchilar:

türkiye büyük millet mejlisi bashliqi ismail qahraman

adalet we tereqqiyat partiyesi guruppa bashliqi binali yildirim

jumhuriyet xelq partiyesi guruppa bashliqi kemal qilichdaroghlu

milliyetchi heriket partiyesi guruppa bashliqi dölet bahcheli

xelqlerning démokratik partiyesi guruppa bashliqi idris baluken