15.03.2024

türkiye awazi radiyosi: «xabertürk» géziti: jumhur reis rejep tayyip erdoghanning dunyaning oxshimighan döletliridin nurghun kishilerning türkiyede dawalinish üchün kéliwatqanliqini éytqanliqini yazdi.

gézitning xewiride körsitilishiche, türkiyening saghlamliq sayahetchilikidiki ülüshining tedrijiy éshiwatqanliqini tekitligen erdoghan: «bu yilning birinchi peslide iltimas qilghuchilar sani 225 mingdin éship ketti» dégen.

«sabah» géziti: iraqning paytexti baghdadta türkiye jumhuriyiti tashqi ishlar ministiri xaqan fidan, dölet mudapie ministiri yashar güler we milliy istixbarat idarisi (MIT) bashliqi ibrahim qalin qatarliqlarning iraq emeldarliri bilen bixeterlik yighini échip, asasliqi bixeterlik we herbiy hemkarliq, térrorluqqa qarshi turushtiki ortaq tonushni ilgiri sürüsh qatarliq mesililerni muzakire qilghanliqini xewer qildi.

«yéngi shepeq» géziti: türkiye jumhuriyiti soda ministiri ömer bolatning londonda engliye soda ishliri weziri kémi badénoch bilen körüshkendin kéyin bayanat bérip, engliye bilen türkiyening erkin soda kélishimini yéngilash toghrisida söhbet bashlighanliqini éytqanliqini yazdi.

«hürriyet» géziti: türkiye iqtisadidiki ijabiy yüzlinishning alaqidar tereplerning diqqitini qozghighanliqini, engliyening HSBC bankisining türkiyening 2024-yilliq éshish mölcherini %2.5 tin %3.1 ke , 2025-yilliq éshish nisbitini %3.5 tin %3.6 ke chiqarghanliqi toghrisidiki uchurlarni oqurmenlirining diqqitige sundi.

«star» géziti: türkiyening tunji alem uchquchisi alper gezerawjining bayanat bérip, qoyup bérish meshghulati élip barghili bolidighan yerlik supa qurush xizmetlirining ishliniwatqanliqini éytqanliqini yazdi.

gézitning xewiride körsitilishiche, «dölet erbablirimiz bu heqtiki xushxewerlirini ortaqlishidu» dégen gezerawji sözini dawamlashturup: «alem boshluqi saheside 10 nishan békitildi, bu nishanlarni emelge ashurush yolidiki xizmetlirimiz dawamlashmaqta» dégenlerni qeyt qilghan.