01.03.2024
bügünki türkiye metbuatida orun alghan bezi muhim xewerlerning qisqiche mezmunliri töwendikiche:
türkiye awazi radiyosi: «hürriyet» géziti: jumhur reis erdoghanning türkiyening 2023-yilliq iqtisadiy éshish körsetküchi toghrisida toxtilip: «türkiye iqtisadi bultur yer tewresh we bashqa selbiy ehwallargha qarimay, %4.5 éship, intayin muhim muweppeqiyetke érishti. shundaq qilip, iqtisadimiz uda 14 pesil ashqan boldi. bu sanliq melumatlar bilen, (türkiye) yawropadiki iqtisadiy eng köp ashqan dölet boldi» dégenlikini oqurmenlirining diqqitige sundi.
«star» géziti: türkiye iqtisadining 2023-yili %4.5, öktebir-dékabir aylirida bolsa, bir aldinqi yilning oxshash peslige sélishturghanda %4 éship, iqtisadiy hemkarliq we tereqqiyat teshkilatigha eza döletler ichide ikkinchi, 20 dölet guruhi döletliri ichide üchinchi bolghanliqini xewer qildi.
«yéngi shepeq» géziti: türkiyening özi ishlepchiqarghan uchquchisiz hawa apparatliri / qoralliq uchquchisiz hawa apparatliri bilen, bu sahening bayraqdarliri bolghan israiliye bilen rusiyeni arqida qaldurghanliqini yazdi.
xewerde körsitilishiche, nöwettiki (2024-yilidiki) sanliq melumatlargha qarighanda, 11 ming 500 qoralliq uchquchisiz hawa apparatigha ige bolghan amérika birinchi, 3300 apparatqa ige bolghan xitay ikkinchi, 1000 apparatqa ige bolghan türkiye üchinchi orunda turidiken.
«sabah» géziti: türkiye jumhuriyiti dölet mudapie ministirliqining, amérika teripidin ewetilgen «türkiyege 40 dane yéngi F-16 Block-70s tipliq küreshchi ayropilan sétip bérish we 79 dane F-16 tipliq küreshchi ayropilanni zamaniwilashturush» toghrisidiki «teklip we qobul qilish layihesi»ning ministirliqqa yétip kelgenlikini, munasiwetlik orunlarning tekshürüsh we bahalash xizmetlirini bashliwetkenlikini élan qilghanliqini xewer qildi.
«xabertürk» géziti: türkiye jumhuriyiti jumhur reislik mehkimisi uchur – alaqe ishliri idarisi bashliqi fahrettin altunning bayanat bérip, xelqara marka bahalash orgini — Brand Finance teripidin teyyarlanghan «yershari yumshaq détal körsetküchi»ning 2024-yilliq körsetküchige asaslanghanda, türkiyening médiya we uchur-alaqe saheside bulturqidin 10 baldaq örlep, 193 dölet ichide 18-bolghanliqini éytqanliqini xewer qildi.