12.01.2024

türkiye awazi radiyosi: «star» géziti: türkiye, rominiye we bulghariyening qara déngiz minagha qarshi turush xizmet guruppisi kélishimi imzalighanliqini yazdi.

gézitning xewiride körsitilishiche, türkiye jumhuriyiti dölet mudapie ministiri yashar güler murasimda söz qilip: «biz rayon we yer shariwi bixeterlik, tinchliq we muqimliq ornitishqa tirishiwatimiz. biz montrékis boghuzliri ehdinamisini estayidilliq, mesuliyetchanliq bilen biterep halette yolgha qoyduq» dégen.

«hürriyet» géziti: girétsiye bash ministiri kiryakos mitsotakisning jumhur reis erdoghan bilen üch qétim körüshkendin kéyin, ikki dölet munasiwitige téximu ümidwar pozitsiyede bolushqa bashlighanliqini, türkiye puqralirining girék arallirini wizisiz sayahet qilish tüzümining marttin bashlap yolgha qoyulidighanliqini élan qilghanliqini xewer qildi.

«xabertürk» géziti: türkiye jumhuriyiti mudapie sanaiti idarisi bashliqi xaluq görgünning «bozdoghan» we «gökdoghan» namliq bashqurulidighan  bombilirining layihe tekshürüsh siniqining tamamlanghanliqini bayan qilip: «bashqurulidighan bombilirimiz qobul qilish siniqigha teyyar» dégenlikini yazdi.

«sabah» géziti: «togg»ning yéngi modélining amérika qoshma ishtatlirida dawam qiliwatqan «2024 – yilliq istémalchilar éléktiron yermenkisi»de  tonushturulghanliqini, «togg»ning dunya sehnisige chiqqan yéngi modéli «T10F» ning ziyaretchilerning yuqiri bahasigha érishkenlikini yazdi.

gézitning xewiride körsitilishiche, tokluq mashinilar toghrisida maqalilerni yazidighan amérikaliq kimbérliy jawahéri: «layihe nahayiti ésil, intayin güzel. men omumiy jehettin bekla tesirlendim» dégen.

«yéngi shepeq» géziti: CNN sayahet qanilining dunyadiki eng yaxshi 20 xil shorpini retke tizip chiqqanliqi؛ nurghun döletlerning intayin mezzilik shorpiliri qatarigha türkiyening «yaylaq shorpisi»ningmu kirgüzülgenliki toghrisidiki uchurlarni oqurmenlirining diqqitige sundi.