10.01.2024

türkiye awazi radiyosi: «hürriyet» géziti: türkiye jumhuriyiti tashqi ishlar ministiri xaqan fidanning tünügün qirghizistan tashqi ishlar ministiri jéénbék kulunbayéw bilen körüshüp, ikki dölet munasiwetliri, rayon we xelqaraliq mesililer toghrisida pikir almashturghanliqini yazdi.

gézitning xewiride körsitilishiche, ministir fidan qirghizistanliq mensepdishi bilen ötküzgen qoshma muxbirlarni kütüwélish yighinida söz qilip, gherbning ghezzediki qirghinchiliqni qollishining dunya bixeterlikini xewpke ittergenlikini otturigha qoyghan.

«sabah» géziti: türkiye jumhuriyiti ichki ishlar ministiri eli yerlikaya tünügün türkiyening térrorluqqa qarshi turush kürishi toghrisida söz qilip: «nöwette dölitimizde térror suyiistémal qilidighan saheler qalmidi. dölitimiz xelqi bilen bir gewdileshti. qeyerde térror tehditi yaki bir térrorchi bolsa, uni uwisida turghuzup bir terep qiliwatimiz. bizning axirqi nishanimiz, eng axirqi térrorchi bir terep qilinip bolghuche, kürishimizni dawamlashturushtur» dégenlikini oqurmenlirining diqqitige sundi.

«xabertürk» géziti: 2023-yili antalyagha kelgen chet ellik sayahetchiler sanining 395 ming 479 tirans yoluchini qoshup hésablighanda, 16 milyon 84 ming 737 ge yétip, antalya sayahetchiliki tarixida tunji qétim 16 milyon sayahetchi ötkilidin halqip ketkenlikini yazdi.

«weten» géziti: güle – qaq ishlepchiqirishtiki bayraqdarliq ornini saqlap kéliwatqan türkiyening 2023-yili 70 ming 869 tonna güle éksport qilip, 408 milyon 74 ming dollar kirim qilghanliqini xewer qildi.

«star» géziti: «togg»ning amérika qoshma ishtatlirining laswigas shehiride bashlanghan 2024 - yilliq dunyaning eng chong istémalchilar éléktiron mehsulatliri yermenkisidiki ornini alghanliqini yazdi.

gézitning xewiride körsitilishiche, togg yermenkide ikkinchi eqliy iqtidarliq üskünisi T10F ni dunya sehnisige élip chiqqan.