22.11.2023
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹sabah› géziti», dölitimiz (türkiye jumhuriyiti) jumhur reisi rejep tayyip erdoghanning tünügün aljiriyede bergen töwendiki bayanatini oqurmenlirining diqqitige sundi:
«israiliyening kolléktip jazalandurushqa aylinip ketken we urush jinayiti shekillendürüwatqan hujumlirini qobul qilmaymiz. bizning asasliq meqsitimiz ghezzede uzaq mezgillik urush toxtitishqa we insanperwerlik yardem buyumlirining rayongha dawamliq yetküzüp bérilishige kapaletlik qilishtur.»
«‹sitar› géziti», türkiye sehiye ministiri fahrettin kojaning, 50 kishilik bimarlar tizimlikini tüzüp chiqqanliqlirini, ghezzedin üchinchi qétimliq tarqaqlashturush xizmitining aldimizdiki künlerde élip bérilidighanliqini bayan qilghanliqini yazdi.
«‹hörriyet› géziti»: «selchuq muellim dunya boyiche muweppeqiyet qazanghan 10 yash oqutquchining biri» serlewhilik töwendiki xewirini oqurmenlirining diqqitige sundi:
doktor selchuq yüsüp arslan muellim xelqara yash rehberler we igilik tikligüchiler jemiyiti teripidin «dunya boyiche muweppeqiyet qazanghan 10 yash oqutquchining biri» qilip tallandi. «muhit asrash we exlaqiy rehberlik» saheside dunya boyiche birinchi bolghan arslan, bu mukapatqa érishken tunji türk oqutquchi bolup qaldi.
«‹weten› géziti», «dinlar tarixini zilzilige salidighan bayqash» serlewhilik xewiride, töwendiki melumatlargha orun ajratti:
amasyadiki «oluz xarabiliki» ni qézip tekshürüsh paaliyetliri dawamida, med padishahliqi dewrige ait texminen 2600 yilliq tarixqa ige diniy murasim ötküzülidighan tash üstel bayqaldi. arxéologiyelik qézip tekshürüsh ishliri mesuli piroféssor doktor shewket dönmez bu heqte élan qilghan bayanatida, mundaq dédi:
«hem med padishahliqi hem paris padishahliqi dewrliridiki otqa choqunush aditige xas tash üstel we ibadetxanilarning otturigha chiqishi, kichik asiyaning diniy tarixi we arxéologiyesini zilzilige salidighandek qilidu.»
«‹xewer türk› géziti», «<edliye> namliq téléwiziye tiyatiri xelqara émmiy mukapatigha érishti» serlewhilik töwendiki xewirini oqurmenlirining diqqitige sundi:
bu yil 51-qétim ötküzülgen xelqara émmiy mukapatini tarqitish murasimi amérika qoshma ishtatlirining nyu york shehiride ötküzüldi. murasimda, türkiye ay yapim shirkiti teripidin ishlengen «edliye» namliq téléwiziye tiyatiri «eng yaxshi télénowéla» katégoriyeside xelqara émmiy mukapatigha érishti.
