06.11.2023
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹sitar› géziti»: «erdoghan: <qirghinchiliqni toxtitish bizning bash tartip bolmaydighan mejburiyitimiz> dédi» serlewhilik töwendiki xewirini oqurmenlirining diqqitige sundi:
«pelestinlik qérindashlirimizni israiliyening zulmidin qutquzush we ghezzediki pütkül dunyaning köz aldida yüz bériwatqan qirghinchiliqni toxtitish bizning bash tartip bolmaydighan mejburiyitimizdur. biz ghezzediki qérindashlirimizni hergizmu sahipsiz, charisiz we yalghuz tashlap qoymaymiz.»
«‹yéngi shepeq› géziti»: türkiye sehiye ministiri fahrettin kojaning jiddiy dawalinishqa éhtiyajliq pelestinliklerning türkiyege keltürülidighanliqini tekitlep mundaq dégenlikini yazdi: «ghezzediki türkiye-pelestin dostluq doxturxanisida dawaliniwatqan rak bimarlirini öz ichige alghan jiddiy dawalinishqa éhtiyajliq 1000 gha yéqin bimar we yaridarni, refah chégra éghizi arqiliq misirgha keltürüsh xizmitimiz dawamlishiwatidu. bu xizmet tamamlanghandin kéyin, rak bimarliri we ehwali éghir bolghanlarni qutquzush ayropilanliri, paraxot doxturxaniliri dölitimizge yötkesh pilanlanmaqta.»
«‹sabah› géziti»: türkiye ichki ishlar ministiri eli yerliqayaning, 8 wilayette birla waqitta élip bérilghan «qehrmanlar herikiti» dawamida, bölgünchi térrorluq teshkilati p k k gha ait 21 ghar we panah jayning yer bilen yeksan qiliwétilgenlikini éytqanliqini xewer qildi.
«‹weten› géziti»: bayqar guruhi tetqiq qilip yasap chiqqan «TB3» qoralliq uchquchisiz hawa apparatlirining, marmara rayonigha tesir körsetken we süriti saitige 130 kilométirgha yetken «lodos» namliq boran – chapqunluq qiyin sharait astida élip bérilghan 3-qétimliq 5 saetlik sinaq uchushni muweppeqiyetlik tamamlighanliqini oqurmenliri bilen ortaqlashti.
«‹xewer türk› géziti»: türkiye medeniyet we sayahet ministiri mehmet nuri ersoyning bu yil antalyagha kelgen sayahetchiler sanining 15 milyondin éship ketkenlikini éytqanliqini yazdi.
