әрменийә төт йезисини әзәрбәйҗанға қайтуруп беришни қобул қилди

түркийә авази радийоси хәвири: әзәрбәйҗан муавин баш министири шаһин мустафайеф билән әрменийә муавин баш министири мер гиригорйан рийасәтчиликидики чегра бәлгиләш комитетиниң 8-қетимлиқ йиғини икки дөләт чеграсида өткүзүлди.

әзәрбәйҗан чегра бәлгиләш комитети йиғини һәққидә йазма байанат елан қилип, комитетниң бәзи мәсилиләр тоғрисида келишим һасил қилғанлиқини, келишимгә асасән, әзәрбәйҗанниң ғазаһ вилайити йөнилишидики чеграниң, совет иттипақи йимирилгән вақиттики мәвҗут чеграға асасән бекитилидиғанлиқини билдүрди.

бу линийә бағанис (әрменийә) -бағанис айрим (әзәрбәйҗан), воскепар (әрменийә) -төвәнки әскипара (әзәрбәйҗан), кирантс (әрменийә) -хәйримли (әзәрбәйҗан) вә бәркабер (әрменйә)-қизилһаҗили (әзәрбәйҗан) йезилири арисидин өтиду.

келишимгә асасән, әрменийәниң 1-қарабағ урушида ишғал қиливалған бағанис айрим, төвәнки әскипара, хәйримли вә қизиһаҗили йезилирини әзәрбәйҗанға қайтуруп беридикән. мәзкур райондики чегра линийәсиниң коорденатлири келишимгә айландурулуп, 15-майғичә имзалинидикән.

йиғин җәрйанида, тәрәпләр йәнә комитетниң бирләшмә паалийити тоғрисидики бәлгилимә лайиһәсини 2024-йили 7-айниң 1-күнигичә тәййарлап болушқа келишкән.

шуниң билән бир вақитта, әзәрбәйҗан ташқи ишлар министирлиқи байанатчиси айхан һаҗизадә иҗтимаий таратқу суписи X тики адресида байанат елан қилип: «бу биз узундин бери интизар болуватқан тарихий вәқә. әрменийә 1990-йилларниң бешидин башлап ишғал қилип туруватқан әзәрбәйҗанниң 4 йезисини қайтуруп беришкә қошулди» дегәнләрни қәйт қилди.