bayramow: erméniyege uzun muddetlik tinchliq ornitish teklipimizni sunuwatimiz

türkiye awazi radiyosi xewiri: birleshken döletler teshkilati (b d t) xewpsizlik kéngishi daimiy eza firansiyening telipige binaen, qarabaghdiki özgirishlerni muzakire qilindi.

ezerbeyjan tashqi ishlar ministiri bayramow ezerbeyjanning öz zéminiliridiki térrorluqqa qarshi turush herikitini xelqara qanun we insanperwerlik heq – hoquqlirigha toluq emel qilghan halda élip barghanliqini yene bir qétim otturigha qoydi.

térrorchilargha zerbe bérish herikitining axirlashqanliqini we qarabaghdiki ermenlerning bir gewdilishish musapisining bashlanghanliqini tilgha alghan bayramow, ezerbeyjan emeldarliri bilen qarabaghdiki ermen ahalisi wekillirining yéwlahta körüshkenlikini bildürdi.

u térrorluqqa qarshi turush herikitining «cheklik daire we muwazinetlik halette» élip bérilghanliqini shundaqla uning peqet ezerbeyjan zéminidiki qanunsiz qoralliq küchlernila zerbe obyékti qilinghanliqini tekitlidi.

ezerbeyjanning qanunluq menpeetlerge özara hörmet qilish asasida heqiqiy menide söhbet we muzakirige teyyar ikenlikini tekitligen bayramow: «biz erméniyege yene bir qétim adil we uzaq muddetlik tinchliq teklipimizni sunuwatimiz» dédi.

u sözini dawamlashturup: «qarabagh ermenliri bizning tinch bille yashash endizimizning bir qismi» dégenlerni qeyt qildi.

türkiye muawin tashqi ishlar ministiri, bash elchi buraq aqchapar, türkiyening ezerbeyjan emeldarliri bilen  qarabaghdiki ermen ahalisi wekilliri otturisida élip bérilghan söhbetni qizghin qarshi alidighanliqini we söhbetning ünümlük dawamlishishini ümid qilidighanliqini bildürüp: «biz erméniyening zengezor karidorining échilishini öz ichige alghan wedilirini emelge ashurushini ümid qilimiz» dédi.

erméniye we bashqa alaqidar tereplerni pursetni qoldin bermeslikke chaqirghan aqchapar, türkiyening ikki dölet otturisidiki tinchliq musapisini bashtin- axir qollap kelgenlikini, shu wejidin erméniye bilen bolghan munasiwetlerni normallashturush musapisini bashlighanliqini éytti.

b d t siyasiy ishlar bölümining yawropa, ottura asiya we amérikagha mesul muawin bash katipi miroslaw jénka, b d t ning meydanda emeslikini eskertip ötti.

b d t bash katipi antoniyo gutérrésning jiddiyliktin qattiq endishe qiliwatqanliqini bildürgen jénka, b d t motidillikni saqlap qélishqa chaqiridighanliqini tekitlidi.

u heriketning axirlashqanliqi toghrisidiki uqturushtin waqip ikenliklirini tilgha élip, b d t ning barliq küchler bilen qoyuq alaqini dawamlashturuwatqanliqini we tinchliq ornitish tirishchanliqini qollashqa teyyar ikenlikini sözlirige ilawe qildi.