eliyéw ezerbeyjan xelqige xitab qildi
ezerbeyjan pirézidénti ilham eliyéw ezerbeyjanning qarabaghdiki igilik hoquqi mesilisi toghrisida ezerbeyjan xelqige xitab qildi.
türkiye awazi radiyosi xewiri: ezerbeyjan pirézidénti ilham eliyéw ezerbeyjanning qarabaghdiki igilik hoquqini qayta eslige keltürgenlikini bayan qilip mundaq dédi: «ishinimenki, qarabaghda yashawatqan erméniye nopusi pat yéqinda téximu yaxshi sharaitlargha érishidu.»
eliyéw ezerbeyjan armiyesining qarabaghda qozghighan we urush toxtitish kélishimi arqiliq axirlashqan térrorizmgha qarshi küresh herikitidin kéyin, tünügün ezerbeyjan xelqige xitab qildi.
u aldinqi küni erméniye qoralliq küchliri kömüp qoyghan minaning partilishi sewebidin 6 ezerbeyjan puqrasining hayatidin ayrilghanliqini, 2 - qarabagh urushidin kéyin 300 din artuq ezerbeyjan puqrasining mina sewebidin qaza qilghanliqini eskertti.
eliyéw lachin rayonida chégra kontrol fonkiti qurulghangha qeder erméniyedin qarabaghqa minalar keltürülüp, her xil jaylargha kömüp qoyulghanliqini eskertip mundaq dédi: «bu minalar 2021-yili erméniyede ishlepchiqirilghan bolup, bumu minalarning 2-qarabagh urushidin kéyin, térrorluq hujumlirida ishlitilishi üchün ezerbeyjangha élip kélingenlikini körsitidu. ezerbeyjan derhal zörür tedbirlerni qollinip, düshmenge tégishlik jawab qayturdi. térrorizmgha qarshi küresh tedbirliri dawamida barliq nishanlargha peqet bir kündila yétildi, bu dairide térrorchilar jazalandi. ezerbeyjan igilik hoquqini qayta tiklidi.»
ezerbeyjan pirézidénti ilham eliyéw qarabaghdiki erméniye nopusining ziyangha uchrishining aldini élish üchün, térrorizmgha qarshi küresh herikitidin ilgiri barliq eskerlerge estayidil yolyoruq bergenlikini bayan qilip mundaq dédi: «biz yuqiri éniqliqtiki qorallarni ishlitish arqiliq buni emelge ashurduq.»
ilham eliyéw térrorizmgha qarshi küresh herikitining toxtitishi üchün erméniye qisimlirining qoral-yaraghlirini tashlishi, qoralsizlinishi we ezerbeyjan zéminliridin chiqip kétishining aldinqi shertlirini otturigha qoyghanliqlirini, erméniye küchlirining bu shertlerni qobul qilishidin kéyin urush toxtitish élan qilinghanliqini tekitlidi.
eliyéw qarabaghdiki ermenlerning maarip, medeniyet, diniy we sheher bashliqi saylimi qatarliq barliq heq - hoquqlirining kapaletke ige qilinidighanliqini bayan qilip mundaq dédi: «ezerbeyjanda diniy we milliy kemsitish yoqtur, buningdin kéyinmu bolmaydu.»
مۇناسىۋەتلىك خەۋەرلەر
türkiye qirim tatarliri sürgini we cherkez sürgünini xatirlep bayanat élan qildi
türkiye qirim tatarliri we kawkazdiki qérindash xelqlerning azabini ortaqlishidighanliqini bildürdi.
