eliyéw démokratiye we milliy ittipaqliq küni munasiwiti bilen erdoghangha mektup yollidi

türkiye awazi radiyosi xewiri: ezerbeyjan pirézidénti ilham eliyéw mektupida, herbiy - siyasiy özgirishning aldini élish yolida jénini pida qilghan shéhitlerning qimmetlik eslimilirini chongqur hörmet bilen xatirileydighanliqini bayan qildi.

15 – iyuldiki xainlarche pilanning türkiye tarixidiki qiyin sinaqlarning biri ikenlikige isharet qilghan eliyéw, bu sinaqtin qeddini tik tutup ötken türkiye xelqining iradisining tewrenmeslikini, qeyserlikini, dölet we démokratiyege bolghan sadaqitini pütkül dunyagha yene bir qétim éniq körsitip bergenlikini tekitlidi.

u ashu qiyin künde mürini mürige tirigen türkiye xelqi we dölitining iradisi türtkiside, shéhitlerning qanliri we hayatlirini qurban qilish bedilige qolgha keltürülgen ghelibining, türk xelqining weten söygüsini, tengdashsiz küresh qilish rohini we yéngilmeslikini namayan qilip bergenlikini eskertip: «hemkarliq we milliy ittipaqning simwoli bolghan <démokratiye we milliy ittipaq küni> türkiye döliti tarixida ulugh sherep küni bolup qalidu» dégen ibarilerge orun bérildi.

heqiqiy qehrimanliq dastani yézilghan shu küni qérindash türk xelqining erdoghanning chaqiriqigha derhal awaz qoshup, rezil pilanning aldini élip, türkiyeni éghir pajiedin qutuldurup qalghanliqini bildürgen eliyéw, sözini dawamlashturup: «ezerbeyjan xelqi we döliti deslepki deqiqilerdin bashlapla bu küreshte qérindash türkiye döliti we xelqi bilen bille turup, döletning asasiy qanunluq qurulmisi we qanunluq hökümitige hujum qilghan satqunlarni qattiq eyiblidi. biz bu weqelerdin téximu kücheygen halda chiqqan türk millitining ghelibisini ghelibimiz, xushalliqini xushalliqimiz, qayghusini qayghumiz dep bilduq we bir millet, ikki dölet ikenlikimizni yene bir qétim ispatliduq.

bizning eng chong bayliqimiz bolghan tewrenmes ezerbeyjan- türkiye qérindashliqini, ittipaqliq we hemkarliqimizni saqlap, uni kéyinki ewladlargha miras qilip qaldurush hemde istratégiyelik ittipaqliqimizni her jehettin tereqqiy qildurush we mustehkemlesh üchün ortaq tirishchanliqimizni izchil dawamlashturidighanliqimizgha ishinimen» dégenlerni qeyt qildi.