iraqta türkmenche qaytidin resmiy tillar qataridin orun aldi

türkiye awazi radiyosi xewiri: iraqning resmiy agéntliqi «INA» ning xewer qilishiche, iraq bash ministiri muhemmed shiya essudani türkmencheningmu kerkükte ishlitilidighan resmiy tillar qataridin orun élishi toghruluq yolyoruq chüshürgen.

iraq bash ministirliq mehkimisi bash katibat bashqarmisi kerkük wilayitide resmiy uchur - alaqe ishlirida peqet ereb we kord tilliriningla ishlitilishi üchün, kerkük waliy mehkimisige yolyoruq chüshürgenidi.

kerkükte köp sanliqni teshkil qilidighan étnik milletlerdin biri bolghan türkmenler bu qarargha qattiq naraziliq bildürgenidi.

iraq türkmen fironti (ITC) siyasiy biyurosi bash ministir muhemmed shiya essudanidin bu qararni bikar qilishini telep qilghanidi.

iraq parlaméntidiki türkmen guruppisi teripidin élan qilinghan bayanatta, kerkük wilayitidiki türkmen tilini yoqqa chiqirish qararining asasiy qanungha xilap ikenliki we buni qobul  qilishning mumkin emesliki bildürülgenidi.

 türkiyemu iraq dairiliridin bu qararni bikar qilishini telep qilghanidi.

türkiye tashqi ishlar ministirliqi teripidin élan qilinghan yazma bayanatta,  bu qarar arqiliq iraq dölitining qurghuchiliri we asasliq milletliridin biri bolghan türkmenlerning heq – hoquqlirining depsende qilinghanliqi tekitlengenidi.

bayanatta, iraqningmu, kerkükningmu asasliq milletliridin biri bolghan türkmenlerning heq – hoquqliri we sezgürlüklirige sel qaraydighan bundaq heriketlerning kerkük wilayitide tinchliq ichide birlikte yashash medeniyiti berpa qilish tirishchanliqlirigha ziyan yetküzidighanliqi qeyt qilinghanidi.

bayanatta mundaq déyilgenidi: «iraq dairilirini bu qararni tézdin qaytidin közdin kechürüshke chaqirimiz.»