türkiye-özbékstan-ezerbeyjan üch terep yighini ötküzüldi

türkiye awazi radiyosi xewiri: türkiye-özbékstan-ezerbeyjan tashqi ishlar ministirliri, soda we qatnash ministirliri yighinigha, türkiye tashqi ishlar ministiri mewlüt chawushoghlu, soda ministiri mehmet mush, qatnash ministiri adil karaismailoghlu, ezerbeyjandin tashqi ishlar ministiri jeyhun bayramow, dijital tereqqiyat we qatnash ministiri reshat nebiyéw, iqtisad ministiri mikail jabbarow, özbékstandin tashqi ishlar ministir wekili wladimir narow, qatnash ministiri ilham maxamow, tashqi soda we muawin meblegh sélish ministiri laziz qudretow qatnashti.

özbékstan tashqi ishlar ministir wekili wladimir narow söz qilip, yighinning ezerbeyjanning teklipi we türkiyening qollishi bilen ötküzülgenlikini bildürdi.

u: «xelqara munasiwetler we dunya iqtisadidiki téz tereqqiyatlar eslide türkiye-özbékstan-ezerbeyjan diyalog formatini tereqqiy qildurushni we buni baldurraq emelge ashurushni mejbur qildi. dölet bashliqlirining yéqinqi yillardiki siyasiy iradiliri we tüzgen heriket pilani sayisida, özbékstanning ezerbeyjan hemde türkiye bilen bolghan munasiwetliri yéngi dewrge kirdi, munasiwetler bu dewrde istratégiyelik chongqurluqqa ige boldi» dédi.

u mezkur döletlerning nurghun xelqaraliq mesililerde ortaq meydanini namayan qilghanliqini, oxshash meqset üchün tirishchanliq körsetkenlikini bildürüp: «bu bolsimu, tinchliqperwer, dawamlashturghili bolidighan we dinamik bolghan türk dunyasini shekillendürüshtur» dédi.

u türkiye, özbékstan we ezerbeyjanning rayonlar ara hemkarliqida muhim aktiyor bolalaydighanliqini eskertip, türk xelqliri yashaydighan bu rayonlarning sherq bilen gherb, shimal we jenub arisida ming yillardin béri köwrüklük rol oynap kelgenlikini, bu sewebtin, rayonlar ara qatnash karidorlirini tereqqiy qildurush nuqtisi jehettin éytqanda, bu döletlerning arzusining intayin muhim ikenlikini qeyt qildi.

u özbékstanning baku-tiblis-kars tömür yolining yoshurun küchidin aktip paydilinishqa ehmiyet bergenlikini alahide tekitlidi.

u xitay-qirghizistan-özbékstan tömür yoli layihesining qurulushi üchün tekshürüsh xizmetlirining dawamlishiwatqanliqini, bu yolning trans kawkaz karidorigha tutashturulushi bilen xitaydin yawropaghiche bolghan jughrapiyede tömür yol torining shekillinidighanliqini, özbékstanning bu nuqtidin zengüzar karidorini qayta ishqa kirishtürüshni qollighanliqini bildürdi.

yighinda, türkiye-özbékstan-ezerbjan tashqi ishlar ministirliri, soda we qatnash ministirlirining hazardin ötidighan «sherq-gherb ottura karidori» qatarliq üch dölet ortaq köngül bölidighan mesililerde özara hemkarliqlarni kücheytish témilirini muzakire qilidighanliqi perez qilinmaqta.

ministirlar yighinni axirlashturghandin kéyin, tashkent xitabnamesini imzalaydu.