atatürkke bolghan hörmet «zeper küni» ni özgertishke seweb boldi

türkiye awazi radiyosi xewiri: ezerbeyjan pirézidéntliq mehkimisi zeper künining özgertilgenliki toghrisida bayanat élan qildi.

bayanatta, erméniye yingilgenlikini qobul qilghan we xitabnamige imza qoyghan, shundaqla pirézidént ilham eliyéw teripidin «zeper küni» dep élan qilinghan 10-noyabir künining, türkiye jumhuriyitining qurghuchisi we türk dunyasida ismini altun herpler bilen yazdurghan mustapa kamal atatürkni xatirilesh künige toghra kélip qalghanliqi bildürüldi.

bayanatta, ezerbeyjanni chin qelbidin söygen we «ezerbeyjanning xushalliqini xushalliqimiz, teqdirini teqdirimiz» dégen mustapa kamal atatürkning, her bir ezerbeyjanliqning qelbidin orun alghanliqi we chongqur hörmet bilen eslinidighanliqi tekitlendi.

pirézidént ilham eliyéw 10-noyabirning atatürkni xatirilesh küni ikenlikini nezerde tutup, «zeper küni» ni özgertishni qarar qilghanliqi eskertildi.

bayanatta, her bir ezerbeyjanliq üchün qimmetlik sheher bolghan, qarabaghning merwayiti shusha azad bolghanda, urushning teqdirige muhim tesir körsetkenliki, erméniyening yingilishige we herbiy heriketlirining toxtishigha seweb bolghanliqi qeyt qilinish bilen birge, «zeper küni» ning shusha azad qilinghan 8-noyabirgha özgertilgenliki bildürüldi.

ezerbeyjan armiyesi 44 kün dawamlashqan herbiy heriketlerde, besh sheher merkizini, töt yéza bazar we 286 yézini azad qilishi bilen, erméniye yingilgenlikini qobul qilghan idi.

erméniye ishghal astidiki aghdam, lachin we kelbejer wilayetlirini boshitidighanliqini wede qilghan kélishimge, 10-noyabir (2020) imza qoyghan idi.