pompéyo özbékstan tashqi ishlar ministiri bilen körüshti

türkiye awazi radiyosi xewiri: amérika tashqi ishlar ministiri mayk pompéyo bilen özbékstan tashqi ishlar ministiri abduleziz kamilow paytext tashkentte körüshti. körüshüshtin kéyin, ortaq axbarat élan qilish yighini ötküzüldi.

mayk pompéyo özbékstanning yéqinqi yillarda ijtimaiy jemiyetlerni islah qilish, mejburiy ishqa sélishning aldini élish, dingha étiqad qilsh we pikir erkinliki mesililiride muhim ilgirileshlerni qolgha keltürgenlikini eskertip, amérikaning özbékstanning maliye we baj sistémiliridiki islahatlirigha téxnika jehettin yardem bérishke teyyar ikenlikini qeyt qildi.

u özbékstanning afghanistanda tinchliqning emelge éshishi üchün qilghan heriketlirini qollaydighanliqlirini bildürüp, amérikaning özbékstan bilen afghanistan otturisidiki sodini tereqqiy qildurush üchün 1 milyon dollar yardem qilidighanliqini uqturdi.

özbékstan tashqi ishlar ministiri abduleziz kamilow amérika bilen özbékstan otturisidiki hemkarliqlarning muqim tereqqiy qilwatqanliqini éytti.

u özbékstan tashqi siyasitining «rayonda yaxshi qoshnidarchiliq munasiwetlerni ornitish» qa tayinidighanliqini tekitlep: «ottura asiyani muqim tereqqiy qilghan, parawan we hemkarliq rayoni süpitide körüshni xalaymiz. küchlük döletlerning rayondiki her qandaq riqabitining siyasiy netijilirini körüshni xalimaymiz» dédi.

u özbékstanning amérikaning afghanistan mesilisidiki siyasitidin memnun ikenlikini bildürüp: «oxshimighan mulahizilerning bolushigha qarimay, afghanistanda amérikaning mewjutluqi yillardin buyan muqimliqini saqlaydighan amil bolup keldi. térrorizm, ashqunluq, zeherlik chékimlik etkeschiliki, teshkillik jinayet we bashqa tehditler üstidin ghelibe qildi. amérika bilen taliban otturisidiki biwaste uchrishishlarni qollaymiz. taliban afghanistan jemiyitining bir parchisi we nezerge élinishi kérek bolghan küch hésablinidu. uni nezerdin saqit qilish xata we mumkin emes» dédi.