gebze uniwérsitétida osman batur xatirilendi

türkiye awazi radiyosi xewiri: türkiyening kojaeli wilayitige qarashliq gebze pen-téxnika uniwérsitéti türk tarixi uyushmisi teripidin chaqirilghan «türkistanning istiqlal kürishi we osman batur» namliq yighingha, istanbul uniwérsitéti türkiologiye tetqiqat inistituti türk tarixi fakultéti oqutquchisi dotsént doktor ömer qul ependi alahide teklip bilen qatnashti.

ömer qul ependi xelq qehrimani osman batur heqqide sözligen léksiyeside, osman baturning esli ismining «osman islamoghli» ikenlikini bildürüp: «xitay we rus tajawuzchilirigha qarshi küreshte xelq teripidin uninggha <batur> dégen unwan bérilgen bolup, shuningdin  kéyin uyghur diyarida <osman batur> dep atilip, pütün  xelqning qelb töridin orun élip kelmekte» dédi.

ömer qul ependi osman baturning ömrining axirighiche qilghan azadliq kürishini, ilmiy, etrapliq bayan qilghandin bashqa yene, xitayning hazirqi waqitta uyghur rayonida ijra qiliwatqan mislisiz diniy bésimlirini chüshendürdi. 

uning léksiyesi zor qiziqish qozghidi. oqughuchilar uyghur diyarining nöwettiki weziyiti we tarixiy heqqide bes-beste soal soridi. 

yighin axirida, gebze pen-téxnika uniwérsitéti türk tarixi uyushmisining bashliqi abdullah gürsel dotsént doktor ömer qul ependini teqdirname bilen mukapatlidi.

dotsént doktor ömer qul ependi «qanuniy sultan sulaymanning1-qétim wiyénnani qorshawgha élishi», «shu pontusning sözliri», «esir sherqiy tükistan üchün eysa yüsüp aliptékinning küresh xatirisi (2 qisim)», «baturlar؛ sherqiy türkistanning milliy kürishi» we «10 yilgha sighdurulghan bir ömür؛ osman baturxan» namliq eserliri bilen türkiyede tonulghan tetqiqatchilardin biri hésablinidu.