xotende 8 yil oqutquchiliq qilghanlargha bir yürüsh öy bérilidiken

türkiye awazi radiyosi xewiri: uyghur élining xoten wilayitidiki xoten, lop, qaraqash we guma nahiyelirige, memliket boyiche 8900 oqutquchi qobul qilinidighanliqi toghrisida uqturush tarqitildi.

«junggo maarip géziti» ning tor bétide 7-aprél (jüme) élan qilinghan xewerde bildürülishiche, xoten wilayitidiki töt nahiyede oqutquchiliqqa qobul qilinghanlar bir yürüsh öy bilen teminlinidighan bolup, bir ayliq maashi 6 ming som (yüen) din yuqiri bolidiken. xoten nahiyeside doktorluq unwanigha érishken yaki aliy kespiy téxnika unwani barlar 150 kiwadrat métirliq bir yürüsh öy bilen teminlengendin bashqa, resmiy ishtatliq bolghandin kéyin, 200 ming som makanlishish puli bérilidiken. eger uda 8 yildin artuq xizmet qilsa, teminlengen bir yürüsh öy hediye qilip bériwétilidiken.

magéstirliq unwani yaki muawin aliy kespiy téxnika unwani barlar 100 kiwadrat métirliq öy bilen teminlinidiken. resmiy ishtatliq bolghandin kéyin, 80 ming som makanlishish puli bérilidiken, eger uda 8 yildin artuq xizmet qilsa, teminlengen öy hediye qilinidiken.

pütün künlük aliy mektepni pütküzüp, baklawurluq unwanigha érishkenler 50 kiwadrat métirliq öy bilen teminlinidiken, resmiy ishtatliq bolghandin kéyin, 30 ming som makanlishish puli bérilidiken.

biraq, xewerde oqutquchiliqqa qobul qilinidighanlarning uyghur élidin yaki xitay ölkiliridin qobul qilinidighanliqi, qobul qilinidighanlargha millet cheklimisining bar-yoqluqigha munasiwetlik héchqandaq melumat bérilmidi.

yéqinqi künlerde, uyghur élining her qaysi wilayet, nahiyeliride köpiyiwatqan xitay ölkiliridin saqchi, oqutquchi we iqtisasliq xadim qobul qilish élanliri, shundaqla uyghur élidiki éshincha emgek küchlirini xitay ölkilirige yötkesh ishliri diqqet qozghimaqta.