her küni piyade yol yürimen, chünki...

her küni piyade yol yürimen, chünki...

hörmetlik radiyo anglighuchilar, yaxshimu siler? bügün silerge türkiye awazi radiyosi teripidin türkche teyyarlinip, bashqa tillargha terjime qilip anglitilidighan «chünki...» namliq sehipimizning bu heptilik sanida, «her küni piyade yol yürimen, chünki» dégen témini anglitimiz. qéni undaqta diqqitinglar sehipimizde bolsun!

*  *  *  *

bügün biz salametlikimiz bilen zich munasiwetlik bolghan bir jismaniy heriket toghrisida, téximu énéiqraq qilip éytqanda, her küni muntizm piyade yol yürüsh toghrisida toxtilip ötimiz. bedinimizdiki sistémilar hem öz ichide hemde özara masliship heriket qilidu. mundaqche éytqanda, saghlamliq dégen söz  bu maslishishning éniqlimisi. sistémilar ara maslishishining qalaymiqanlishishi késelliklerni keltürüp chiqiridu. bügünki künde, méditsina dunyasi késelliklerni dawalash métodlirigha qanchilik ehmiyet berse, késelliklerning  otturigha chiqishning aldini élishqimu shunchilik ehmiyet bermekte. bu meqsette ular kishilerning jismaniy paaliyetliri, ozuqlinishi we uyqulirini téximu ünümlük orunlashturushigha paydiliq tekliplerni otturigha qoymaqta. daimliq piyade méngish pütün bedenni chéniqturup, rohiy haletning yuqiriliqini saqlap qalidighan paaliyetlerning aldinqi qataridin orun alidu.

*  *  *  *

dunya sehiye teshkilati yéshining qanche bolushidin qetiynezer, hemmila kishining heptide kem dégende ikki yérim saet méngishini tewsiye qilghan bolup, teshkilatning qarishiche, eng muwpaiq bolghini künde yérim saet, heptide üch yérim saet piyade méngish iken. chünki daim méngish nurghun jehette, bolupmu yürek saghlamliqida muhim rol oynaydu. qan aylinishni tengsheydighan piyade méngish métabolizmni tézlitish arqiliq ziyade semirip kétishining aldini élishtiki eng ünümlük usul, dep qarilidu. piyade méngish muskulni quwwetlep, bughumlarning saghlamliqini ashurghanliqi üchün, muskul we söngek sistémimizning eng yaxshi dosti bolushqa erziydu. tetqiqatlarda körsitilishche, bedinimizning immunitét küchi méngish arqiliq ashidiken.

*  *  *  *

muntizm piyade yol yürüshning bedinimizgila emes, rohimizghimu paydiliq ikenlikini eskertip öteyli. piyade méngish jeryanida ajrilip chiqqan andorfin hormuni bizning xushalliq derijimizni ashurup, bésimni töwenlitidu. méngish arqiliq tengshelgen sistémimiz téximu süpetlik uxliyalaydu. aram alghan beden we yéngilanghan eqil bilen künni bashlashmu bizni özimizni yaxshi hés qilish pursitige ige qilidu. dostlirimiz yaki aile ezaliri bilen birlikte yol yürüsh, pipade méngish bolsa, ijtimaiy rishtimizni kücheytishimizge yardem béridu.

*  *  *  *

bügünki künde yanfon we eqliy iqtidarliq qol saetliri kündilik méngish waqtimiz we qedem sanimizni hésablaydu. yuqirida bayan qilghanlirimizning astigha «men daim mangimen, chünki men kündilik qedem sanimni ijtimaiy alaqe torida hembehirleymen» dégen ibarini ilawe qilip, sözlirimizni axirlashturayli.

*  *  *  *