türkiyening jazalash heriketliri we p k k ning iplas néft tori

jazalash heriketliri we p k k ning iplas néft tori

küntertip we analiz (03)

(jan ajun)

türkiye awazi radiyosi: térrorluq teshkilati p k k ning iraqning shimalidiki taghliq rayonlarda türkiye armiyesige qilghan térorluq hujumidin kéyin, türkiye hawa armiyesi we istixbarat idarisining qoralliq uchquchisiz ayropilanliri iraq we süriyede hawadin bombardiman qilish arqiliq jazalash herikitini élip bardi. türkiye yéngi bir urush permani süpitide térrorluq teshkilati élip barghan hujumlardin kéyin, iraq we süriyede keng kölemlik hawa herikiti élip barmaqta. bu dairide térrorluq teshkilatning énérgiye ul- esliheliri we ishlepchiqirish eslihelirini hujum nishani qilishi, diqqetlerni p k k ning süriyede qurghan néfit we tebiiy gaz sahesi hökümranliqi terepke bir qétim tartti. ‎

térrorluq teshkilati p k k adette qish aylirida qishliq panahlinish dep atilidighan bir heriket uslubi bilen chékinip, bu mezgilde özini qoghdashqa merkezlishetti shundaqla panahjaylardin maarip we idiyewi terbiye paaliyetliri üchün paydilinatti. lékin p k k yéqinqi mezgilde, bolupmu iraqning shimalidiki taghliq rayonlarda türkiye qoralliq qisimlirigha  arqa-arqidin hujum qildi.  bu yerde hawa rayi sharaiti yaratqan pursetler aldinqi pilangha chiqish bilen birge, bu teshkilatning meghlubiyet pisxikisidin qutulush we egeshküchilirige «men hazirmu mewjut» dégen uchurni yetküzüsh üchün «özini öltürüwélish» xaraktérlik hujumlarni qiliwatqanliqini oylishishqa bolidu.  

netijide, p k k bu hujumlarda éghir ziyanlargha uchridi. lékin, bu yerde israiliyening ghezzediki hujumi dairisde shekillengen yéngi  rayon xaraktérlik küch talishish kürishinimu hésabqa qétish we bu teshkilatning özini qollawatqan tashqi küchlerge «hazirmu ishlitishke uyghunluqum bar»  dégenni namayan qilish meqsitini shundaqla türkiyening énérgiyesini qaytidin térrorluq bilen xoritishqa urunuwatqan küchlernimu untup qalmasliq kérek.

aqiwet bu hujumlar yüz berdi we türkiye buninggha intayin éghir jawab qayturdi. eger bu heriket usuligha atalghu ishlitishke toghra kelse, uni jazalash herikiti déyishke bolidu.

deslepte istanbulning istiqlal kochisida yüz bergen térrorluq hujumidin kéyin, yolgha qoyulghan urush telimati, p k k ning türkiye, iraq yaki süriyede élip barghan térrorluq hujumidin kéyin, bolupmu teshkilatning süriyediki terkiblirige qarita intayin éghir hawadin bombardiman qilish herikiti élip bérip, teshkilatqa nisbeten hujumning tennerxini köpeytishni asas qilghan bir urush telimati idi.

bu axirqi qétimliq térrorluq hujumidin kéyin, türkiye qoralliq qisimliri we istixbarat idarisigha tewe qoralliq uchquchisiz ayropilanlar süriyede nuqtiliq ul eslihelirini hujum nishani qilghan onlarche hawa hujumi élip bardi. bolupmu teshkilatning ishghaliyiti astidiki istratégiyelik néfit we tebiiy gaz ishlepchiqirish merkezlirige zerbe berdi. suwaydadiki néfit we tebiiy gaz ishlepchiqirish bazisi shundaqla odeh néfit zawutimu zerbe bérilgen ul esliheliri qatarida idi.  p k k amérikaning qollishi bilen süriyede énérgiye menbelirining %70 tin köprekini özi yalghuz alqinida tutup kelmekte. bu menbe künige 300 ming waril néfit ishlepchiqirish dégenlik bolidu, yeni milyardlarche dollarliq ishlepchiqirish iqtidari dégenlik bolidu. lékin, meydan sharaiti hemde türkiyening herbiy arilishishi bu ishlepchiqirish iqtidarining emelge éshishini tosup kelmekte we teshkilatning néfit sétish arqiliq meblegh yürüshtürüshining qismen aldini almaqta. aldimizdiki mezgillerde türkiyening munasiwetlik  hawa heriketlirini téximu chongqurlashturidighanliqini perez qilalaymiz. ‎