qandaq qilghanda tirnaq chishlesh aditidin qutulghili bolidu?

(doktor mehmet uchar)

tirnaq chishlesh késili

tirnaq chishlesh jemiyette  nahayiti köp uchraydighan bir mesile.

tirnaq chishlesh késili dégen néme?

gerche tirnaq chishlesh késili jemiyette addiy adet dep qaralsimu, emma u pisxikiliq sewebliri bar bolghan bir xil késelliktur.

tirnaq chishlesh késellikide adem chishliri bilen tirnaqlirini üzüp tashlaydu. bezi kishiler chishliri bilen tirnaqlirini üzgendin kéyin yémeydu, yene beziler bolsa tirnaqlirini chishlep yutuwalidu. tirnaq chishlesh aditi bar kishiler tirnaqning asti we etrapidiki térige ziyan yetküzidu. tirnaq chishlesh késili bar bezi kishilerde chach tartish we tére yulush qatarliq dawamliq bedenge ziyan yetküzidighan heriket qalaymiqanchiliqlirimu körülüshi mumkin.

tirnaq chishlesh késelliklirining sewebliri néme?

tirnaq chishlesh mesilisining néme sewebtin kélip chiqidighanliqi éniq melum emes. yene bir tereptin, tirnaq chishlesh aditi irsiyetlik özgirish amilliridin biri dep qarilidu. buningdin bashqa yene, bundaq kishilerning yéqin aile ezalirida teshwishlinish qalaymiqanliqi mesilisi köp körülidu. tirnaq chishlesh aditi bar kishiler adette bu adetni jiddiylik we teshwishlinish tuyghusi bilen baghlinishliq halda béshidin kechürüwatqanliqini ipadileydu.

tirnaq chishleshning ziyini

tirnaq chishlesh késili sewebidin barmaqlarda, tirnaqlarda we tirnaq göshliride toqulmilarning zeximlinishi körülidu. bundaq kishilerde tirnaqlar shekilsiz yoghan we zeximlik bolidu. tirnaq chishlesh aditi éghiz boshluqi yarisi we chish késelliklirini keltürüp chiqiridu. térining yuqumlinishi we zemburughning shekillinishi tereqqiy qilidu. tirnaqlirini chishlep yutuwalidighan kishiler ashqazan we üchey yuqumlinish késelliklirige giriptar bolidu. tirnaq rayonidiki wirus we zemburughlarning éghiz shilliq perdisi bilen uchrishishi ikkilemchi yuqumlinish éhtimalliqini ashuruwétidu. meslen, tirnaq chishlesh aditi bar kishilerde sögeldin yuqumlinish ehwalliri köp körülidu.

balilardiki tirnaq chishlesh mesilisi

balilarda tirnaq chishlesh aditi adette 3-4 yashta bashlinip, ösmürlük mezgilide körünerlik derijide tereqqiy qilidu. balilarda 3 yashtin burun tirnaq chishlesh aditi az körülidu.

qandaq qilghanda tirnaq chishlesh aditidin qutulghili bolidu?

tirnaq chishlesh aditidin bir kéchidila qutulalmasliqingiz mumkin, emma azraq waqit we küch serp qilip, tirniqingizni chishlesh istikingizni menggü tizginliyelishingiz mumkin.

töwendiki usullardin paydilinip tirnaq chishlesh mesilisige qarshi küresh qilsingiz bolidu:

• siz qilishqa tégishlik birinchi ish, adette kündüzi bu heriketni qeyerde qilidighanliqingizni yéqindin közitishtur. heriketke zor töhpe qoshidighan we kücheytidighan herqandaq zérikish, teshwish qatarliq héssiy baghlinishning bar – yoqluqini közdin kechürüshingiz kérek.

tirnaq chishlesh aditingizning yétilishining seweblirini tépip chiqqandin kéyin, bu aditingizni özgertish üchün kéyinki qedemni bassingiz bolidu.

• eger siz tirnaq chishlesh qozghatquchliringizni del waqtida közitiwatqan bolsingiz, tashlishingizgha tégishlik kéyinki qedem tirnaqliringizni qanchilik waqitta bir chishleydighanliqingizni xatire depterge yézishtur. birla waqitta hem yézish hem tirnaqliringizni chishlesh tes. bir az waqit chiqirip, tirnaq chishlesh herikitingizni xatire depterge yézishingiz, tirnaq chishlesh ritimini buzup tashlap, bu herikitingiz üstide oylinishingiz üchün sizge purset yaritip béridu.

• tirniqingizni hemishe qisqa tutung. qisqa tirnaqlar bu adettin qutulushingizda muhim rol oynishi mumkin. chünki bundaq bolghanda chishliringiz bilen tirnaqliringizni üzelmeysiz.

• tirnaqliringizgha dorixanilarda rétsépsiz sétilidighan süzük we nachar tatliq tirnaq gélini sürüng.

• daim tirnaq asrashqa ehmiyet béring. chünki bu tirniqingizni chishlimekchi bolghiningizda heriketke ötüshingizning aldini alidu.

• tirnaqliringizni ochuq tutmang. tirnaqliringizni ochuq tutmasliq üchün, sizge jismaniy jehettin tosalghu bolidighan peley kiysingiz, yaki tirnaqliringizgha yara chapliqi chaplisingiz bolidu.

• kichik balilarda yirginchlik jümle ishlitish tewsiye qilinmaydu. chünki bundaq bolghanda diqqet qozghash sewebidin balilarda téximu köp tirnaq chilesh aditi éship kétidu.

• tirnaq chishlesh aditini aktip heriketke özgertishke tirishing. mesilen, tirnaq chishlesh istikingiz qozghalghan haman bésim topi bilen meshghul bolung.

• yene bir xil usul bolsa sizning tirniqingizni chishlishingizge seweb bolidighan amillarni éniqlap chiqip, bu amillardin saqlinishqa tirishishtur.

• tirnaq chishlesh aditini tedrijiy halda azayting. mesilen, zéhningizni merkezleshtürüp, ikki qolingizning bash barmaqlirini qetiy chishlimeslikke irade baghlang. buni emelge ashurghandin kéyin, bashqa tirnaqliringiz üchünmu bu usuldin paydilip chishlesh aditidin pütünley qutulushni nishan qiling.

• bezi kishilerge dawalinishi tewsiye qilinidu. dawalinishta bimarning tirnaq chishlesh mesilisi bilen yüzlishishi we dawalinish mesilisige ijabiy qarishigha toghra kélidu.