ана сүтини ашурушниң тәбиий чарә - тәдбирлири

(доктор мәһмәт учар)

ана сүтини ашуридиған йемәкликләр төвәндикичә:

сулу сүт ишләпчиқиришни ашуридиған һормонниң аҗрилип чиқишини ашуриду.

күнҗүт мәлһими, ноқут, лимон, зәйтун йеғи вә самсақни ишлитип тәййарланған талқан, ана сүтини ашуридиған йемәкликләр ичидә биринчи орунда туриду.

омега - 3 ниң тәркибидики озуқлуқ қиммитиниң йуқирилиқи билән диққәт қозғайдиған  салмон  белиқи, ана сүтини ашуриду.

аниниң суйуқлуқ еһтийаҗини қандуруш үчүн озуқлуқ қиммити йуқири болған йайлақ шорписи, көктат шорписи, шорпа билән тәййарланған шорпилар ана сүтини ашуридиған шорпилар қатаридин орун алиду.

су истемал қилиш ана сүтини ашуриду. күндә истемал қилинидиған су 2-2.5 литир болуши керәк.

сүт, йаңақ, хасиң вә күнҗүт мәлһими ишлитип тәййарланған ана сүтини ашуридиған татлиқ - турумларму сүтниң сүпитини өстүриду.

ана сүтиниң техиму йахши болуши үчүн аниларниң нашта қилиши наһайити муһим. әгәр нашта қилишқа әһмийәт берилмисә, ана сүти азийип кетиши мумкин.

йавропа кәрәпшиси, арпибәдийан, қетиқ пишлақ вә йаңақ билән тәййарланған арилашмилар аниларниң наштилиқидин орун елиши керәк.

тәркибидә ақсил вә витаминлар көп болғанлиқтин, ана сүтини ашурушта сүт, айран вә кефир қатарлиқ ичимликләр моһим рол ойнайду. болупму ухлаштин илгири сүтлүк ичимликләр ана сүтини ашуриду.

беһи, алма вә йәл – йемишләр ишлитип тәййарланған вә ана сүтини ашуридиған тәркибләр, болупму шекәрсиз тәййарланғанда техиму пайдилиқтур.

роземарийә, зирә, бәдийан, дарчин, чөл рәйһини, зәнҗивил вә зәрчивә қатарлиқ ана сүтини  ашуридиған маддиларни ишлитип тәййарланған ичимликләрниму күн бойи истемал қилишқа болиду.

буниңдин башқа йәнә, йешил йопурмақлиқ көктат, персейә нәшпүти вә ананас ишлитип тәййарланған көктат ичимликлиридә ана сүтини ашуридиған витаминларму бар.

арпа, ана сүтиниң аҗрилип чиқишини ашуридиған һормонни көпәйтиду.

минерал суму ана үчүн муһим ичимликтур. магнийниң мәнбәси болған тәбиий минерал суни мевә парчилири вә қетиқ билән ичсиңиз болиду. айран йасиғанда суниң орниға минерал су ишләтсиңизму болиду. пәсил характерлик мевиләрни сиқип минерал су билән арилаш истемал қилсиңизму болиду.

ана сүтини ашуридиған чайниң түрлири төвәндикичә:

бәдийан, лина, арпибәдийан, зирә вә бәлизгүл ишлитип тәййарланған өсүмлүк чай, ана сүтини ашуриду. бу өсүмлүкләр бовақларниң йәл мәсилисигиму пайдилиқтур.

чаққақ от уруқи, шумба, арпибәдийан, дарчин вә лимон ишлитип тәййарланған чай болса ана сүтини ашуридиған чайлар арисида тәми вә өзгичә пуриқи билән алқишқа еришиду.

ана сүтини ашуруш үчүн чай ичишни халайдиған анилар, қурутулған мевиләрни қайнақ суда дәмләп истемал қилса болиду. қурутулған өрүк, қурутулған әнҗүр вә қурутулған үҗмә қатарлиқ мевә – чевиләр сайисида шекәрсиз пүтүнләй тәбиий чайға еришкили болиду. бу чай анини раһәтләндүриду, боваққа берилидиған сүтниму көпәйтиду.

ана сүтини ашуридиған мевә – чевиләр төвәндикичә:

 қурутулған әнҗүр, қуруқ үзүм, қурутулған өрүк, хорма қатарлиқ қуруқ мевә – чевиләр калтсий вә магний миқдари сәвәбидин ана сүтини ашурушта үнүмлүк рол ойнайду.

ушшақ-чүшшәк йемәкликләрдә йаңақ, хасиң, бадам қатарлиқ майлиқ уруқлар билән биллә истемал қилинидиған қурутулған мевә – чевиләрму бала емитиватқан аниларниң енергийә еһтийаҗини қандурушқа йардәм бериду.

кавиму ана сүтини ашуридиған мәһсулатларниң биридур.

тәркибидә витамин C мол болған бөлҗүргән, апелсин, мандарин, алма, өрүк, йеңи үзүм, беһи, гилас, тавуз, қоғун, шаптул вә персейә нәшпүти қатарлиқ мевә – чевиләрдиму ана сүтини ашуридиған алаһидиликләр бардур.

ана сүтини ашуридиған өсүмлүкләргә кәлсәк؛

сәвзә ана сүтини ашуридиған көктатлар ичидә биринчи орунда туриду. бала емитиватқан аниларға салат, тамақ вә шорпилириға сәвзә қошуши тәвсийә қилиниду.

төмүр тәркиби мол болған қурутулған пурчақму һәм аҗритип чиқирилидиған сүтниң сүпитини һәмдә миқдарини ашуриду.

калләкбәсәй, паләк, йавропа кәрәпшиси, семизот, осуң қатарлиқ ана сүтини ашуридиған йешил көктатлар,  чоқум бала емитиватқан аниларниң озуқлуқ пирограммисиға киргүзүлүши керәк.

буниңдин башқа йәнә, ана сүтини ашуридиған самсақ вә пийаз қатарлиқ өсүмлүк мәһсулатлирини хам йаки пишурулған йемәкләр вә салатларда ишлитишкә болиду.

«ана сүтини ашуридиған мөҗизә» дәп аталған арпибәдийанни һәр вақ тамақта салатқа селип истемал қилиш керәк.

ана сүтини ашуридиған арилашмилар төвәндикичә:

қурутулған әнҗүр: сәккиз йаки тоққуз қурутулған әнҗүрни йерим литир хилорсиз суда қайнитип, сүйини ичип бәрсә, ана сүтини ашуриду.

қурутулған әнҗүр вә сәвзә ишлитип тәййарланған арилашмни уда 21 күн чүштин бурун вә чүштин кейин ичип бәргәндә, ана сүтни ашурушта йуқири үнүмгә еришкили болиду.

ана сүтини ашуридиған үҗмә сүйи ушшақ-чүшшәк йемәкликләрдә йеңи вә қуруқ һаләттә қайнитип ичилиду.